პარლამენტის ვიცე-სპიკერის, „ქრისტიან-დემოკრატი“ ლევან ვეფხვაძის განცხადებით, კონტროლის პალატის მიერ გამოქვეყნებული ანგარიშის მიხედვით, „ქრისტიან- დემოკრატიული მოძრაობა“ ყველაზე ღარიბი პარტიაა და მან პარტიული იდეების განხორციელების მიზნით, ქდმ-ს 20 ათასი ლარი შესწირა.
როგორც ვეფხვაძემ დღეს „ნიუსპრესს“ განუცხადა, ყველა შემომწირველი თანხის გაღების მომენტისთვის პარტიის წევრი იყო.
„პოლიტიკოსებს შორის არის სერიოზული განსხვავება. არიან პირები, რომლებიც პოლიტიკაში იმისთვის მოდიან, რომ სახლში წაიღონ, არიან პოლიტიკოსები, რომლებიც ცდილობენ თუნდაც ხელფასის სახით არსებული თანხა გაიღონ იმისთვის, რომ პოლიტიკური იდეები განახორციელონ. მე ამ პოლიტიკოსებს მივეკუთვნები“ - განაცახდა ვეფხვაძემ.
მისი თქმით, მას და პარტიის სხვა წევრებს აქვთ ისეთი შემოსავალი, რომ პარტიას გარკვეული თანხა შესწირონ.
„ჩვენი შემოწირულობა იმ ადამიანებზეა დაფუძნებული, რომლებიც პარტიის აქტიური წევრები არიან და გადახდის რესურსიც აქვთ. ჩვენ მზად ვართ ყველა შემოწირულობაზე პასუხი ვაგოთ“ – აღნიშნა ვეფხვაძემ.
ამასთან, ის კონტროლის პალატას სხვა პარტიების შემომწირველთა შემოსავლებისა და გაღებული თანხების შედარებას სთხოვს.
მისი თქმით, „ნაციონალურ მოძრაობასთან“ ერთად შესამოწმებელია კოალიცია „ქართულ ოცნებაში“ შემავალი პარტიების მონაცემები.
„ყველაზე მეტი შემოწირულობა ერთი მხრივ „ნაცმოძრაობას“ აქვს, რაც გასარკვევია. მეორე მხრივ კი, „ქართული ოცნების“ პარტიებს ჯამში არანაკლები თანხა აქვთ შეწირული. გასარკვევია, ხომ არ არის ეს პირადად ივანიშვილის მიერ მიცემული თანხა და მერე მათ მიერ გაკეთებული შემოწირულობა“ – განაცხადა დეპუტატმა.
ქდმ-ს შემოწირულობა წლის დასაწყისიდან 19 ივნისის ჩათვლით, 50 000 ლარს არ აღემატება. აქედან, ყველაზე მსხვილი ფინანსური დახმარება 20 ათასი ლარია, რომელიც პარტიას ლევან ვეფხვაძემ მიმდინარე წლის მარტში შესწირა.
„ერთიანმა ნაციონალურმა მოძრაობამ“ 1 მლნ 768 ათას 492 ლარის ოდენობის ფულადი შემოწირულობა მიიღო, პოლიტგაერთიანება „ქართული ოცნება - დემოკრატიული საქართველოს“ ანგარიშზე – 43, 923 ლარი, ხოლო საზოგადოებრივი მოძრაობა „ქართული ოცნების“ – 492,917 ლარია.