პოლიტიკური პარტია „ახალი მემარჯვენეების“ თელავის ორგანიზაციის თავმჯდომარემ ნიკა ვარდოშვილმა დღეს, პრესკონფერენციაზე თელავის რაიონის სოფლებში გაზიფიცირების პრობლემაზე ისაუბრა და ხელისუფლებას ამ პრობლემის მოგვარებისკენ მოუწოდა.
ვარდოშვილის განცხადებით, მიუხედავად იმისა, რომ ხელისუფლება ხმამაღლა საუბრობს ქვეყანაში გაზიფიცირების პრობლემის მოგვარებაზე თელავის რაიონის სოფლების 85%-ზე მეტი დღეს ბუნებრივ აირს ვერ მოიხმარს.
„თელავის რაიონის სოფლების მოსახლეობა იმ საფასურს, რასაც კომპანია „ვისოლი“ მოითხოვს, ვერ გადაიხდის, რადგან მათი ფინანსური მდგომარეობის გათვალისწინებით, 600-800 ლარის ერთჯერადად გადახდა წარმოუდგენელია“ -განაცხადა ვარდოშვილმა.
მისი თქმით, ხელისუფლებამ იმ კომპანიებთან, რომლებსაც ვალდებულება აქვთ აღებული, გაზიფიცირების საფასურის განვადებით გადახდის საკითხი უნდა მოაგვაროს.
ვარდოშვილი ამ პრობლემების გადაჭრაში ყველა სახელისუფლებო სტრუქტურის როგორც ცენტრალური, ისე ადგილობრივის ჩარევას ითხოვს.