საქართველოს პარლამენტის დიასპორისა და კავკასიის საკითხთა კომიტეტის თავმჯდომარე, ნუგზარ წიკლაური ჩეჩნეთის რესპუბლიკა იჩქერიის  ყოფილი წარმომადგენლის საქართველოში ხიზრი ალდამოვის მიერ საქართველოს ხელისუფლების წინააღმდეგ გაკეთებულ განცხადებებს პროვოკაციას უწოდებს .
ამასთანავე, წიკლაური ხაზ უსვამს, რომ ეს განცხადებები ალდამოვისგან მისთვის მოულოდენლი არ ყოფილა, მას შემდეგ, რაც ალდამოვმა საკუთარ პოლიტიკურ წარსული და ჩეჩნეთის ექს–პრეზიდნეტთან კავშირები უარყო.
„არ გამვკვირვებია, როდესაც ალდამოვმა ძალიან ტრივიალური და პრიმიტიული განცხადებების გაკეთება დაიწყო საქართველოში ტერორისტებს მზადების შესახებ. ეს ძველი სიმღერაა და ეს ჩვენ რუსეთის ხელისუფლების მაღალჩინოსნების მხრიდან ათასჯერ მოგვისმენია“ – განაცხადა წიკლაურმა.
დეპუტატი დარწმუნებულია, რომ ალდამოვი რუსეთის ხელისუფლების მაღალჩინოსნების მითითებით მოქმედებს.
რუსული მედიის ცნობით, საქართველოში ჩეჩენთა სათვისტომოს ყოფილმა ხელმძღვანელმა ხიზრი ალდამოვმა ჩეჩნეთში გამართულ პრესკონფერენციაზე განაცხადა, რომ ქართული მხარე ედუარდ შევარდნაძის ხელმძღვანელობით ბოევიკებს მფარველობდა და რუსეთში განხორციელებული მრავალი ტერაქტი საქართველოდან იყო დაგეგმილი.
ამასთანავე, ის ამტკიცებს, რომ მიხეილ სააკაშვილი და საქართველოს სპეცსამსახურები ცდილობენ იჩქერიის მთავრობის ახალი შემადგენლობის შექმნას რუსეთზე ზეწოლისა და ჩეჩნეთის რესპუბლიკაში ტერორისტული საქმიანობის აქტივიზაციის მიზნით.
ამ განცხადებების გაკეთებამდე, საქართველოში ჩეჩენთა დიასპორის ყოფილი ხელმძღვანელი ჩეჩნეთში დაბრუნდა და ახლანდელ პრეზიდენტს რამზან კადიროვს პატიება სთხოვა და ერთგულება შეჰფიცა.
ალდამოვმა ასევე განაცხადა, რომ ყოფილ პრეზიდენტებს ჯოხარ დუდაევს და ასლან მასხადოვს საკუთარი ხალხისთვის მცირედი სარგებლობაც არ მოუტანიათ.