აფხაზეთი არასოდეს დაბრუნდება საქართველოს შემადგენლობაში. ეს განცხადება აფხაზეთის დე-ფაქტო პრეზიდენტმა ალექსანდრე ანქვაბმა საქართველოში  ჩეხეთის ელჩთან ივან ესტრაბთან სოხუმში შეხვედრაზე გააკეთა, იუწყება „აპსნიპრესი“.
„ჩვენ არასოდეს დავბრუნდებით საქართველოს შემადგენლობაში და გვინდა, რომ ჩვენმა პარტნიორებმა ეს გააცნობიერონ“ - განაცხადა ანქვაბმა და აღნიშნა, რომ აფხაზეთი თავისი ცხოვრებით ცხოვრობს და სურვილი აქვს, რომ მისმა პარტნიორებმაც, ასევე, ცალკეული ქვეყნების წინაშე ვალდებულებების გარეშე იცხოვრონ.
ჩეხეთის ელჩის განცხადებით, ის თვალს ადევნებს აფხაზეთში მიმდინარე მოვლენებს და მიჩნევს, რომ ინფორმაცია არასაკმარისია.

მისივე განცხადებით, აფხაზეთში ამ ვიზიტს ორი მიზანი აქვს - მიმდინარე პროცესებზე ღიად საუბარი და აფხაზეთის მოთხოვნების გაცნობა, რათა ჩეხეთის რესპუბლიკასა და აფხაზეთს შორის შესაძლო თანამშრომლობის სფეროები განისაზღვროს.

როგორც ანქვაბმა აღნიშნა, აფხაზური მხარე ყოველთვის მზადაა დიპლომატებთან გულახდილი საუბრისთვის. ამასთან, მან ხაზი გაუსვა, რომ ამჟამად, დასავლეთის ქვეყნებთან ურთიერთობებში ერთგვარი სტაგნაციაა, რაც, მისი თქმით, იმით არის გამოწვეული, რომ აფხაზეთს მიუღებელ პროექტებს სთავაზობენ.

„მზად ვართ კონკრეტული და სერიოზული საუბრისთვის და სხვა რამეზე დროს ნურავინ დაკარგავს. ჩვენ ჩვენი ხაზით მივდივართ და გვინდა, რომ ჩვენი პარტნიორებიც, ცალკეული ქვეყნების წინაშე ვალდებულებების გარეშე თავისი ხაზით მიდიოდნენ“ - განაცხადა თვითგამოცხადებული რესპუბლიკის პრეზიდენტმა.

მანვე აღნიშნა, რომ იმისთვის, რომ ურთიერთობა ნათელი და გასაგები იყოს, მხარეებისთვის მისაღები თამაშის წესები უნდა შემუშავდეს.