პოლიტიკური კოალიცია „ქართული ოცნების“ ლიდერთან ბიძინა ივანიშვილთან გუშინდელ შეხვედრაზე „სახალხო კრების“ წარმომადგენლებმა  საპარლამენტო არჩევნებში მაჟორიტარი დეპუტატობის კანდიდატების დასახელების საკითხი განიხილეს.

როგორც „ნიუსპრესს“ „სახალხო კრების“ წევრმა, მსახიობმა სოსო ჯაჭვლიანმა განუცხადა, შეხვედრა ივანიშვილის ინიციატივით შედგა.

მისივე თქმით, კოალიციის ლიდერმა „სახალხო კრების“ წარმომადგენლებს მაჟორიტარულ ოლქებში ერთიან კანდიდატზე შეთანხმება შესთავაზა. საუბარია როგორც თბილისზე, ისე რეგიონებზე.

„უნდა შევთანხმდეთ ერთიან კანდიდატებზე, რათა ხმების გაყოფა არ დავუშვათ. ამ მთავრობას ერთიანი ძალით უნდა შევუტიოთ“- განაცხადა ჯაჭვლიანმა.

მისივე თქმით, შეთანხმების შედეგად, „სახალხო კრებამ“ ისეთი კანდიდატები უნდა წარადგინოს, რომლებიც კონკრეტულ რაიონში განსაკუთრებული ავტორიტეტით და პატივისცემით სარგებლობენ და ხმების მაქსიმალური რაოდენობის მოპოვებას შეძლებენ.

„მთავარი თანამდებობების დაკავება არ არის, ქვეყანაა გადასარჩენი. ჩვენ იმაზე არ ვფიქრობთ, ვინ სად მოვკალათდებით. ადამიანური სისუსტეები გვერდზე უნდა გადავწიოთ“-განაცხადა ჯაჭვლიანმა.
მისი თქმით, ივანიშვილის შეთავაზება პირადად მისთვის დიდი პატივია. მას მაინცდამაინც მაჟორიტარი დეპუტატობის ამბიცია არ აქვს, თუმცა მზადაა, იმ ნდობის გასამართლებლად იბრძოლოს, რომელიც კოალიციის ლიდერმა გამოუცხადა.

კოალიცია „ქართული ოცნების“ ლიდერმა ბიძინა ივანიშვილმა ერთ-ერთ ქართულ გამოცემასთან საუბარში აღნიშნა, რომ თუ ნონა გაფრინდაშვილი, სოსო ჯაჭვლიანი და ლუკა კურტანიძე რეგიონებში კოალიციასთან შეთანხმებით მაჟორიტარებად იყრიან კენჭს, „ქართული ოცნება“ საკუთარ კანდიდატურებს მოხსნის და მათ დაუჭერს მხარს.

ჯაჭვლიანის გარდა, ბიძინა ივანიშვილთან გუშინდელ შეხვედრას „სახალხო კრების“ სხვა წევრები - ნონა გაფრინდაშვილი, ლუკა კურტანიძე და გია ბურჯანაძეც ესწრებოდნენ.