კოალიცია „ქართული ოცნების“ ლიდერის ბიძინა ივანიშვილისა და „სახალხო კრების“ წარმომადგენელთა შეხვედრა უკვე დასრულდა.

შეხვედრას „სახალხო კრებიდან“ ნონა გაფრინადაშვილი, გია ბურჯანაძე, ლუკა კურტანიძე და სოსო ჯაჭვლიანი ესწრებოდნენ.

შეხვედრის დეტალებზე არც ერთი მხარე ჯერჯერობით კომენტარს არ აკეთებს, თუმცა, ცნობილია, რომ შეხვედრაზე რეგიონებში კრების წარმომადგენლების მხრიდან მაჟორიტარი დეპუტატობის კანდიდატობასთან დაკავშირებით ივანიშვილის შეთავაზებაზე იმსჯელეს.

შეხვედრის შესახებ ოფიციალურ ინფორმაციას კოალიცია უახლეს საათებში გაავრცელებს.

კოალიცია „ქართული ოცნების“ ლიდერმა ბიძინა ივანიშვილმა ერთ-ერთ ქართულ გამოცემასთან საუბარში რამდენიმე დღის წინ აღნიშნა, რომ "სახალხო კრების" წევრებისადმი მას აქვს სურვილი და შეთავაზება. აღნიშნული წინადადების თანახმად, თუ ნონა გაფრინდაშვილი, ლუკა კურტანიძე, სოსო ჯაჭვლიანი რეგიონებში კოალიციასთან შეთანხმებით მაჟორიტარებად იყრიან კენჭს, „ქართული ოცნება“ საკუთარ კანდიდატებს მოხსნის და მათ დაუჭრს მხარს. შეთავაზება „სახალხო კრების“ აღმასრულებელმა საბჭომ გუშინდელ სხდომაზე განიხილა და ამ საკითხზე კოსულტაციების დაწყების უფლება ნონა გაფრინდაშვილს, გია ბურჯანაძეს, ლუკა კურტანიძეს და სოსო ჯაჭვლიანს მიანიჭა.