ბაგრატის ტაძრის სარეკონსტრუქციო სამუშაოები გაგრძელდება და ტაძარი პირვანდელ სახეს დაიბრუნებს. ამის შესახებ საქართველოს კულტურისა  და ძეგლთა დაცვის მინისტრმა ნიკა რურუამ პარიზში, „იუნესკოს“ წარმომადგენლებთან გამართული შეხვედრების შემდეგ განაცხადა.

რურუამ ბაგრატის ტაძრის რესტავრაციის შეწყვეტის მიზეზად გაუგებრობა დაასახელა და განაცხადა, რომ ძეგლის აღდგენა „იუნესკოს“ მიერ შერჩეული ექსპერტების პროექტის მიხედვით მიმდინარეობდა, თუმცა, მოგვიანებით ორგანიზაციამ საქართველოში საკითხის შესასწავლად საშუალო დონის სპეციალისტი გამოგზავნა, რომელმაც სარეკონსტრუქციო სამუშაოების შესახებ არაკვალიფიციური დასკვნა გააკეთა.

მინისტრმა აღნიშნულ თემაზე მოლაპარაკებები მსოფლიო მემკვიდრეობის სამსახურის ხელმძღვანელთან გამართა.

„ყველაფერი, რაც სოციალურ ქსელში ფოტოების სახით გავრცელდა, დეზინფორმაციაა, რომელიც დესტრუქციის, საკითხის პოლიტიზებისა და იდეის დისკრედიტაციისკენაა მიმართული“ - განაცხადა რურუამ.

საქართველოში დაბრუნების შემდეგ მინისტრი საპატრიარქოს წარმომადგენლებთან შეხვედრას და საქმის დეტალების გაცნობას გეგმავს.

„ამ საკითხთან დაკავშირებით საპატრიარქოც დეზინფორმირებულია“-აღნიშნა რურუამ.

ბაგრატის ტაძართან დაკავშირებით ბოლო დროს განვითარებულ მოვლენებზე ნიკა რურუა რესტავრატორებთან და კულტურული მემკვიდრეობის ეროვნული სააგენტოს ხელმძღვანელ ნიკა ვაჩეიშვილთან ერთად პრესკონფერენციაზე ისაუბრებს.