პოლიტიკური კოალიცია „ქართული ოცნება“ შსს-ს გენერალური ინსპექციის ხელმძღვანელის გიორგი გეგეჭკორის დაკითხვასა და სისხლის  სამართლის საქმის აღძვრას მოითხოვს.
ამის შესახებ კოალიცია განცხადებას ავრცელებს, რომელშიც ნათქვამია, რომ „ქართული ოცნება“ არ საჭიროებს რაიმე ჩანაწერებს და მით უმეტეს, მათი მოპოვების ორგანიზებაში მონაწილეობას.
განცხადებაში აღნიშნულია, რომ კოალიციისთვის ისედაც კარგად არის ცნობილი, თუ რა განწყობა სუფევს საჯარო სამსახურში, მათ შორის პოლიციაში, რადგან კოალიციაში მხარდამჭერების და მოხალისეების მხრიდან, მსგავსი ტიპის უამრავი ინფორმაცია ყოველდღიურად შედის, რაც მათივე თქმით, ნათელ სურათს ქმნის საჯარო სამსახურში არსებული მდგომარეობის შესახებ.
„ხელისუფლებას კურტანიძე-ჭელიძის საქმე თავად სჭირდება ჩვენი კოალიციისთვის ჩრდილის მისაყენებელად, მაგრამ ამგვარი მეთოდები უკვე აღარ ჭრის. სამწუხაროა, რომ ხელისუფლება პატიმარ ადამიანს იყენებს იარაღად ამ ბინძურ საქმეში“- აცხადებენ „ქართულ ოცნებაში“ და აღნიშნავენ, რომ შეშფოთებას იწვევს პოლიციელი ლაშა კურტანიძის ბედი, რომელიც შესაძლოა, თავად იყოს წინასწარ დაგეგმილი პროვოკაციის მსხვერპლი.
„როგორც მისი მეუღლის მიერ ერთ-ერთ ტელევიზიაში მიტანილი წერილიდან იკვეთება, ლაშა კურტანიძის მიმართ შინაგან საქმეთა სამინისტროს გენერალური ინსპექციის ხელმძღვანელის - გიორგი გეგეჭკორის მხრიდან, სავარაუდოდ, ადგილი ჰქონდა წამებისა და ფიზიკური განადგურების მუქარის ფაქტს, რის შემდეგაც, ლაშა კურტანიძე იძულებული გახდა, ჯერ მიეცა ცრუ ჩვენება, ხოლო შემდეგ მიმალულიყო“- ნათქვამია განცხადებაში.
კოალიციაში მიაჩნიათ, რომ ლაშა კურტანიძე და მისი ოჯახი სერიოზული საფრთხის ქვეშ დგანან და მიუხედავად იმისა, რომ „ქართულ ოცნებას“ ამ საქმესთან შეხება არ აქვს, კოალიცია ლაშა კურტანიძის ოჯახს თანადგომას უცხადებს და კანონით დაშვებულ ყველა ზომას მიმართავს მათი უსაფრთხოების უზრუნველყოფის და მხარდაჭერის მიზნით. კოალიციაში აცხადებენ, რომ ლაშა კურტანიძის საქმე აჩვენებს, თუ როგორ ექცევა სააკაშვილის ხელისუფლება სამშობლოს სამსახურში მდგარ პოლიციელებს.
„ხელისუფლებისგან მოვითხოვთ, უზრუნველყოს, როგორც ლაშა კურტანიძის ოჯახის, ასევე პატიმარ ზაზა ჭელიძისა და მისი ოჯახის უსაფრთხოება, რომელთაც, სავარაუდოდ, ზეწოლის შედეგად მიაცემინეს მათთვის საჭირო ე.წ. აღიარებითი ჩვენება. მოვითხოვთ, აღიძრას სისხლის სამართლის საქმე წერილში მოყვანილი წამებისა და მუქარის ფაქტზე, დაიკითხოს გიორგი გეგეჭკორი, დადგინდეს სიმართლე და დაისაჯონ დამნაშავეები“- აცხადებენ კოალიციაში.
პოლიციელ ლაშა კურტანიძის მოსყიდვის ბრალდებით დაკავებულ ზაზა ჭელიძეს სასამართლომ ორთვიანი წინასწარი პატიმრობა შეუფარდა. გამოძიების ინფორმაციით, გარკვეული თანხის სანაცვლოდ, ჭელიძესთან შეთანხმებით ლაშა კურტანიძეს შსს-ს თანამშრომლები ფარულად უნდა გადაეღო. შინაგან საქმეთა სამინისტრომ აღიარებითი ჩვენებების ვიდეომასალაც გაავრცელა, სადაც ჭელიძე საუბრობს, რომ მან ჩანაწერები თავის მეგობარს ირაკლი სესიაშვილს გადასცა და მისგან კურტანიძისთვის გადასაცემად კონვერტი მიიღო.