„საქართველოს ბანკის“ სათაო ოფისის წინ „ლეიბორისტული პარტიის“ ორგანიზებით გამართული აქციის მონაწილე, რომელმაც პროტესტის ნიშნად ვენების გადაჭრა სცადა, ღუდუშაურის კლინიკაში გადაიყვანეს.
როგორც „ნიუსპრესს“ ლეიბორისტების ერთ-ერთმა ლიდერმა პაატა ჯიბლაძემ განუცხადა, დაახლოებით 50 წლის ქუთაისელმა გია ხამაშურიძემ მაჯაზე საკანცელარიო დანა დაისვა, რის შემდეგაც მან გონება დაკარგა.
ჯიბლაძის თქმით, სასწრაფო სამედიცინო დახმარების ბრიგადამ, რომელიც ადგილზე 40 წუთის დაგვიანებით გამოცხადდა, ხამაშურიძე ღუდუშაურის საავადმყოფოში გადაიყვანა.
როგორც ჯიბლაძემ აღნიშნა, ხამაშურიძე და მისი ყოფილი ბიზნეს-პარტნიორები „საქართველოს ბანკისგან“ კრედიტის გადავადებას ითხოვდნენ.
„ამ ადამიანებმა ქუთაისის ცენტრში აიღეს ავარიული შენობა, რომლის გასარემონტებლად ბანკიდან კრედიტი 1 მლნ 300 ათასის ოდენობით გამოიტანეს, ბანკში კი - შესაბამისი გასარემონტებელი შენობა ჩადეს, რომლის ღირებულება 5 მლნ დოლარი იყო. ბანკის კრედიტი, 1 მლნ 200 ათასი დოლარის ოდენობით, მათ გადაიხადეს, მაგრამ 2008 წლის ომისა და მსოფლიო ეკონომიკური კრიზისის გამო, საქართველოს სხვა მოქალაქეების მსგავსად, ისინი მძიმე მდგომარეობაში აღმოჩნდნენ, ამიტომ სთხოვეს ბანკს, კრედიტის გადახდა გადაევადებინა და მათი კუთვნილი ქონება არ გაეყიდა“-განაცხადა ჯიბლაძემ და დასძინა, რომ მიუხედავად ამისა, „საქართველოს ბანკმა“ მათ ქონებას ექსპროპრიაცია გაუკეთა, ბინები გაუყიდა, ახლა კი - დამატებით 1 მლნ 300 ათასი აშშ დოლარის გადახდას ედავება.
ხამაშურიძე და მისი ყოფილი ბიზნეს-პარტნიორები „საქართველოს ბანკისგან“ სწორედ ამ სესხის გადავადებას ითხოვდნენ.