პარლამენტის ვიცე-სპიკერი რუსუდან კერვალიშვილი ოპოზიციონერი დეპუტატის ჯონდი ბაღათურიას განცხადებას დაუსაბუთებელს უწოდებს.
როგორც კერვალიშვილმა „ნიუსპრესს“ განუცხადა, ნებისმიერი განცხადება, რომელიც არ არის დასაბუთებული ადამიანის უფლებებს და უდანაშაულობის პრეზუმფციას არღვევს.
მისი თქმით, ასეთი სახის განცხადება მისასალმებელი არ არის.
ჯონდი ბაღათურიამ დღეს მასშტაბური ამნისტიის პროექტის განხილვისას განაცხადა, რომ პარლამენტში სხედან აქლემის ქურდები და იჭერენ ნემსის ქურდებს. ბაღათურიას თქმით, პარლამენტს ჰყავს ვიცე–სპიკერი, რომელსაც 5 ათასი ადამიანი თანხების მითვისებას ედავება. მან კერვალიშვილი იგულისხმა, რომელიც სამშენებლო კომპანია „ცენტრ–პოინტის“ ერთ–ერთი დამფუძნებელი იყო.