„ეკოლოგიური სამართლის ცენტრმა” და ისნის მოსახლეობამ „ვისოლ-პეტროლიუმ ჯორჯიას” მიერ გაზგასამართი სადგურის მშენებლობის დაწყება გააპროტესტეს.

„ეკოლოგიური სამართლის ცენტრის“ ინფორმაციით, მოსახლეობა აღშფოთებულია დოდაშვილის მოედანზე, საცხოვრებელი სახლების, ეკლესიისა და სკვერის სიახლოვეს, გაზგასამართი სადგურის მშენებლობით, რადგან მიაჩნია, რომ სადგური მათთვის საფრთხეს წარმოადგენს.

მათივე ინფორმაციით, არაერთი თხოვნის მიუხედავად, კომპანიამ მოსახლეობის აზრი არ გაითვალისწინა.

„ეკოლოგიური სამართლის ცენტრის” ხელმძღვანელის ნიკოლოზ მჟავანაძის განცხადებით, ეს მშენებლობა „ავტოგასამართი სადგურებისა და კომპლექსების უსაფრთხოების წესების დამტკიცების შესახებ” ეკონომიკისა და მდგრადი განვითარების სამინისტროს #1-1/2935 ბრძანებას ეწინააღმდეგება.

„ეკოლოგიური სამართლის ცენტრი” მოუწოდებს „ვისოლ-პეტროლიუმ ჯორჯიას” - უარი თქვას დასახლებულ პუნქტში გაზგასამართი სადგურის მშენებლობაზე.
წინააღმდეგ შემთხვევაში, მჟავანაძის თქმით, ცენტრი ყველა კანონიერ საშუალებას გამოიყენებს აღნიშნული მშენებლობის აღკვეთის მიზნით.