უმაღლესი საკანონმდებლო ორგანოს ოპოზიციურმა ფრაქციამ „ერთობა სამართლიანობისთვის“ დღეს, პლენარულ სხდომაზე 30 წუთიანი დებატები მოითხოვა და  ქვეყანაში არსებულ უმძიმეს სოციალ-ეკონომიკურ მდგომარეობასა და ხელისუფლების უმოქმედობაზე გააკეთა განცხადებები.
როგორც ფრაქციის წევრმა ჯონდი ბაღათურიამ აღნიშნა, ეს არის ამ მოწვევის პარლამენტის ბოლო დებატები და აქედან გამომდინარე, მან ოთხი წლის მანძილზე გაწეული საქმიანობის შეჯერებისას განაცხადა, რომ ეს იყო ყველაზე ცუდი მოწვევის პარლამენტი, რადგან მან აღმასრულებელ ხელისუფლებას ერთი წინააღმდეგობაც ვერ გაუწია.
თუმცა, დეპუტატის თქმით, სიტუაციის გამოსწორება ჯერ კიდევ შეიძლება და მან დეპუტატებს პრეზიდენტისთვის იმპიჩმენტის გამოცხადების საკითხზე ხელმოწერისკენ მოუწოდა.
ბაღათურიას განცხადებით, ქვეყანაში „კანონიერი ქურდები“ „ჰალსტუხიანმა ქურდებმა“ შეცვალეს და მოსახლეობისგან ფულის გამოძალვა მიმდინარეობს, რის მაგალითადაც, მან საპროცესო გარიგება დაასახელა.
„არ არსებობს არცერთი ბანკი, რომელიც პარლამენტის და მთავრობის წევრებს, პრემიერს და პრეზიდენტს არ ეკუთვნოდეს. ერთია მხოლოდ „ქართუ ბანკი“ და ყველა ვხედავთ რა დღეში აგდებენ“ - განაცხადა დეპუტატმა.
ბაღათურიამ ხაზგასმით აღნიშნა, რომ პრეზიდენტი აჭარის დაკარგვას უწყობს ხელს, სადაც მისი თქმით, იქ პროსტიტუციის სახით, სამარცხვინო ბიზნესია გაბატონებული.