კოალიცია „ქართული ოცნება“ ხელისუფლებას „თავისუფალი დემოკრატების“ ლაგოდეხის საინიციატივო ჯგუფის ხელმძღვანელის ზურაბ გამეზარდაშვილისა  და მისი ოჯახის წევრების პოლიტიკური დევნისგან თავის შეკავებას ურჩევს.
ამის შესახებ კოალიცია განცხადებას ავრცელებს, რომელშიც ნათქვამია, რომ 17 ივნისს, ტელეკომპანია „მაესტრო“-ს არხზე გავიდა სტუდია GNS-ისა და ნანა ლეჟავას „კვირის რეპორტაჟი“ ზვიად ხვედელიძის საქმესთან დაკავშირებით.
კოალიციის განმარტებით, სიუჟეტის თანახმად, ზვიად ხვედელიძე შსს-ს კუდ-ის მიერ იძულებით „ქართული ოცნების“ ერთ-ერთი პოლიტიკური სუბიექტის - „თავისუფალი დემოკრატების“ რიგებში იქნა შეგზავნილი. ხვედელიძის ერთ-ერთი მისია „თავისუფალი დემოკრატების“ ლაგოდეხის საინიციატივო ჯგუფის ხელმძღვანელის ზურაბ გამეზარდაშვილის დაკავება უნდა ყოფილიყო, თუმცა, თანამშრომლობაზე დათანხმების შემდეგ, ხვედელიძემ მომხდარის შესახებ ზურაბ გამეზარდაშვილს აცნობა, მოსალოდნელი საფრთხის შესახებ გააფრთხილა და საქართველო დატოვა.
„18 ივნისს, სარწმუნო წყარომ კოალიციას აცნობა, რომ მოცემული სიუჟეტის ეთერში გასვლის შემდეგ, კუდ-ის ხელმძღვანელმა დათა ახალაიამ კუდ-ის კახეთის სამმართველოს უფროსი - ზურაბ ლალიაშვილი და კუდ-ის ლაგოდეხის ჯგუფის უფროსი - თამაზ ჯავახიშვილი თავისთან დაიბარა და უშვერი სიტყვებით შეამკო იმის გამო, რომ ზურაბ გამეზარდაშვილმა კუდ-ის აგენტი ქალბატონის „გაშიფვრა“ შეძლო და ასევე, სააშკარაოზე გამოიტანა ინფორმაცია ზვიად ხვედელიძის კუდ-თან თანამშრომლობაზე იძულების შესახებ“ - აცხადებენ კოალიციაში და აღნიშნავენ, რომ როგორც აღმოჩნდა, კახეთის კუდ-ის ამ შეცდომების შესახებ დათა ახალაიამ ნანა ლეჟავას სიუჟეტიდან შეიტყო. იმავე წყაროს თანახმად, დათა ახალაიამ პირდაპირ დაავალა ზურაბ ლალიაშვილსა და თამაზ ჯავახიშვილს ზურაბ გამეზარდაშვილის დაკავება იარაღის ჩადების ან სხვა გზით და, საჭიროების შემთხვევაში, ზურაბის შვილის - 22 წლის ნიკოლოზ გამეზარდაშვილის დაკავებაც მოითხოვა.
როგორც „ნიუსპრესს“ „ქართული ოცნებიდან“ აცნობეს, დღესვე, კუდ-ის ხელმძღვანელის მიერ მიღებული უკანონო გადაწყვეტილების შესახებ მიღებული ინფორმაცია კოალიციამ სამართლიანი და თავისუფალი არჩევნების უწყებათაშორის კომისიას გადაუგზავნა და მისგან, პრევენციის მიზნით, რეაგირება მოითხოვა. იგივე ინფორმაცია მიეწოდათ დიპლომატიურ კორპუსსა და საერთაშორისო დამკვირვებლებს.