პრეზიდენტის პრესსპიკერი მანანა მანჯგალაძე მოლდოვის მერის დორინ კირტუაკის განცხადებას გამოეხმაურა, მიხეილ სააკაშვილის მოლდოვის პრეზიდენტად მიწვევის საკითხთან დაკავშირებით.

მისი თქმით, კიშინოვის მერი პრეზიდენტის დიდი ხნის მეგობარია და ის საკმაოდ ხშირად სტუმრობს საქართველოს.

„იგი კარგად არის გათვითცნობიერებული იმ რეფორმებში რაც გატარადა და მიმდინარეობს საქართველოში. გვიხარია, რომ ასეთი შეხედულება აქვს ჩვენს რეფორმებზე და იმაზე, რაც საქართველოში კეთდება“ - აღნიშნა მანჯგალაძემ.

მედიასაშუალებებში გავრცელებული ინფორმაციით, კიშინოვის მერმა დორინ კირტუაკიმ მერიაში გამართულ სხდომაზე საქართველოს პრეზიდენტის მიხეილ სააკაშვილის მოლდოვის პრეზიდენტად მიწვევის საკითხი დააყენა.

მერის თქმით, მიხეილ სააკაშვილს მალე საპრეზიდენტო ვადა ეწურება და კარგი იქნება თუ იგი მოლდოვის პრეზიდენტი გახდება და საქართველოში გატარებულ წარმატებულ რეფორმებს მოლდოვაშიც განახორციელებს.