პოლიტიკური კოალიცია „ქართული ოცნების“ ლიდერი ბიძინა ივანიშვილი მიიჩნევს, რომ ხალხი მას არა ფულის, არამედ მისი განვლილი ცხოვრების გამო უჭერს მხარს.

როგორც მან ოზურგეთში აქციაზე განაცხადა, ხელისუფლება ცდილობს ყველაფერი სხვანაირად წარმოაჩინოს და საზოგადოებას ეს საკითხი პირიქით დაანახოს.

„მჯერა, რომ ქართველები ჩემი განვლილი ცხოვრების გამო მიჭერენ მხარს და არა იმიტომ, რომ სხვაზე მეტი ფინანსური საშუალება მაქვს. ასეთი ხალხისთვის ღირს თავგანწირვა, თუმცა, ხელისუფლებას ყველა თავისნაირი ჰგონია და ხალხის მხარდაჭერას ანგარებას და გამორჩენის სურვილს აბრალებს. ეს თქვენი და ჩვენი შურაცხყოფაა“ - განცახადა ივანიშვილმა.

მისივე თქმით, ქართველი ხალხისთვის მთავარია ღირსება და არა ფული.

როგორც ივანიშვილმა განაცხადა, ზუსტად ამას ადასტურებს გურიის შვილის, ექვთიმე თაყაიშვილის ცხოვრება.

„კაცს, რომელსაც მთელი ქვეყნის განძი ებარა, პიჯაკიც არ ჰქონია. აი სწორედ ასეთი ადამიანია ქართველებისთვის იდეალი“- აღნიშნა ივანიშვილმა და დასძინა, რომ ოცნებობს ისეთ სახელმწიფოზე, სადაც ყველას ექნება საშუალება საკუთარი ნიჭითა და შრომით მიაღწიოს წარმატებას.
მისივე თქმით, ნიჭი და ნიჭიერება გურულების მოგონილია და ამის შურის გამო მიატოვა გურია ხელისუფლებამ.

ივანიშვილის განმარტებით, წლებია აქ არაფერი გაკეთებულა და რაც იყო, ისიც გაპარტახდა.

„ქართული ოცნების“ ლიდერმა აღნიშნა, რომ გურიას უჭირს და სტუმართმოყვარობით განთქმულ გურულებს აღარც სტუმრის გამასპინძლება შეუძლიათ და არც საკუთარი თავის რჩენა, რაც აუცილებლად შეიცვლება და გამოსწორდება.