საქართველოს საგარეო საქმეთა სამინისტრო რუსეთის ფედერაციაში საქართველოს მოქალაქეების დევნასთან დაკავშირებით განცხადებას ავრცელებს.

როგორც მასშია აღნიშნული, რუსეთის ფედერაციაში დაწყებულია ადამიანის უფლებების მასობრივი დარღვევების მორიგი სერიოზული ტალღა. მიმდინარეობს ოპოზიციის წარმომადგენელთა და განსხვავებული აზრის მქონე ადამიანების სახლებისა და ოფისების ჩხრეკა, დაპატიმრებები, ფიზიკური ანგარიშსწორება და მათი საქმიანობის შეზღუდვა სხვადასხვა ძალადობრივი მეთოდებით.

საგარეო საქმეთა უწყება აღნიშნავს, რომ სწორედ ამ ტალღის კონტექსტში უნდა იყოს განხილული საქართველოს მოქალაქეების დევნის მორიგი კამპანია, რომლის დაწყებასაც რუსეთის ფედერაციის მიგრაციის ფედერალური სამსახურის უფროსის კონსტანტინე რომოდანოვსკის მიერ დღეს გაკეთებული განცხადებები მოწმობს.

„აღსანიშნავია, რომ კონსტანტინე რომოდანოვსკის გამონათქვამებს რუსეთის საინფორმაციო საშუალებებში უკვე უწოდეს „ქართველებზე ნადირობის გამოცხადება"-აღნიშნულია საგარეო საქმეთა სამინისტროს განცხადებაში.

ვაშაძის უწყება განმარტავს, რომ რომოდანოვსკი მთლიანად ამართლებს 2006 წელს საქართველოს მოქალაქეებისა და ეთნიკური ქართველების დევნისა და დეპორტაციის პროცესში რუსეთის ხელისუფლების მიერ ადამიანის უფლებების მასობრივ დარღვევებს, არაადამიანურ მოპყრობას, წამებას და საერთოდ არ ახსენებს იმ ადამიანებს, რომლებიც ეთნიკური დევნის კამპანიამ იმსხვერპლა.

„რუსეთის ხელისუფლების წარმომადგენელთა მხრიდან ეთნიკური შეუწყნარებლობის ფაქტებს მომდევნო წლებშიც მასობრივი ხასიათი ჰქონდა, რის სამწუხარო მაგალითსაც წარმოადგენს ეთნიკურად ქართველი რუსეთის მოქალაქის მამუკა კახიშვილის სასტიკი მკვლელობა რუსეთის შინაგან საქმეთა სამინისტროს თანამშრომლების მიერ“-აღნიშნულია განცხადებაში.

იქვე ნათქვამია, რომ დღეისთვის საქართველოს მოქალაქეებისა და ეთნიკური ქართველების დევნის მორიგი კამპანია ადამიანის უფლებებისადმი კრემლის დამოკიდებულებას კიდევ უფრო თვალსაჩინოს ხდის.