ბიძინა ივანიშვილის ბაკურიანის რეზიდენციის დაცვის უფროსის დაკავებას ადვოკატი შალვა თადუმაძე პოლიტიკურ ზეწოლად აფასებს.
მისი თქმით, საგამოძიებო ორგანოები ცდილობენ რევაზ მუმლაძის საქმესთან დაკავშირებით ძალაში შესული სასამართლო გადაწყვეტილება, სადაც ის უდანაშაუოდაა აღიარებული - შეცვალონ. საქმის მასალებიდან თვალნათლივ ჩანს, რომ რევაზ მუმლაძე პოლიტიკური პატიმარია. ის თავს დამნაშავედ არ ცნობს და დუმილის უფლებას იყენებს. ამის შესახებ "ნიუსპრესს" ადვოკატმა შალვა თადუმაძემ განუცხადა.
მუმლაძე დაბა ბაკურიანში, სახელმწიფო საკუთრებაში არსებული მიწის ნაკვეთის ყალბი დოკუმენტების გამოყენებით, უკანონოდ მისაკუთრების ბრალდებით დააკავეს.
ადვოკატ შალვა თადუმაძის ცნობით, ის ფაქტობრივი გარემოება რაზეც დღეს გამოძიება საუბრობს ცნობილი 2011 წელშიც იყო. მაშინ მუმლაძე ცნეს როგორც კეთილსინდისიერი შემძენი. მასთან გამოძიებას კითხვები არ გააჩნდა. თადუმაძის თქმით, სისხლის სამართლის საქმის წარმოება ბიძინა ივანიშვილის მიერ პოლიტიკაში მოსვლის თაობაზე განცხადების გაკეთების შემდეგ დაიწყო.
რევაზ მუმლაძე ამჟამად თბილისის მერვე დაწესებულებაში იმყოფება. მისი სასამართლო პროცესი 5 აპრილსაა ჩანიშნული.
"ჩვენ ყველა სამართლებრივ საშუალებას გამოვიყენებთ, რომ რევაზ მუმლაძის უდანაშაულობა დავამტკიცოთ. ის არის პოლიტიკური პატიმარი და მისი დაკავება უკავშირდება იმას, რომ მუმლაძე ივანიშვილთან დაახლოებული პირია" - განაცხადა შალვა თადუმაძემ "ნიუსპრესთან" საუბარში.