პოლიტიკური კოალიცია ,,ქართული ოცნების“ მორიგი აქცია ოზურგეთში 17 ივნისს გაიმართება. ამის შესახებ დღეს გამართულ პრესკონფერენციაზე კოალიციის პრესსპიკერმა მაია ფანჯიკიძემ  განაცხადა.
მან ქუთაისში გუშინ გამართული აქცია დადებითად შეაფასა და იმერეთის რეგიონის მაცხოვრებლებს მხარდაჭერისთვის მადლობა გადაუხადა.
მისი თქმით, გუშინდელი აქცია ძალიან მნიშვნელოვანი მეორე ღონისძიება იყო , რომელიც „ქართულმა ოცნებამ“ ჩაატარა.
როგორც ფანჯიკიძემ აღნიშნა, იმერეთის მოსახლეობამ თავისი განწყობა გამოხატა და ამით, კოალიციას კიდევ ერთხელ განუმტკიცა რწმენა, რომ ოქტომბრის არჩევნებში ,,ქართული ოცნება“ აუცილებლად გაიმარჯვებს.
როგორც ფანჯიკიძემ აღნიშნა, აქციის ჩატარება გუშინ დაგეგმილი სცენარით ვერ მოხერხდა.
,,გვინდოდა მომღერლებს რამდენიმე ნომერი შეესრულებინა, აქცია სიმღერით უნდა დაესრულებინა ბერა ივანიშვილს, მაგრამ ქუთაისში, პარლამენტის შენობის ტერიტორიაზე ჩამონგრების შედეგად მომხდარი ტრაგედიის გამო გეგმები შევცვალეთ“ - განაცხადა ფანჯიკიძემ და აღნიშნა, რომ აქციაზე ბიძინა ივანიშვილმა დაასახელა ის რამდენიმე მნიშვნელოვანი გზავნილი, რაც კოალიციისთვის პრიორიტეტული იქნება - ჯანდაცვა, სოფლის მეურნეობა და განათლება.
მან აღნიშნა, რომ დავით აღმაშენებლის ძეგლის მიმდებარე ტერიტორია და ბალახვანის ასსაფეხურიანი კიბეები იმის საშუალებას იძლეოდა, რომ აქცია ლამაზად გაფორმებულიყო. მისი თქმით, აქცია კარგად ორგანიზებული იყო და რაიმე ინციდენტს ადგილი არ ჰქონია.
ფანჯიკიძემ ჟურნალისტებს და მედია საშუალებების წარმომადგენლებს ბოდიში მოუხადა და აღნიშნა, რომ ხალხმრავლობის და სივიწროვის გამო, ბევრ მათგანს არ მიეცა საშუალება საქმიანობა შეუფერხებლად განეხორციელებინა.