კოალიცია „ქართული ოცნების“ ლიდერი ბიძინა ივანიშვილი ქუთაისში, აქციაზე შეკრებილ ხალხს სასამართლოს სფეროში რეფორმების განხორციელებას დაჰპირდა.
მისი თქმით, ქუთაისი ის ქალაქია, სადაც ხალხმა საკუთარ თავზე გამოსცადა, თუ რას ნიშნავს კრიმინალური კლანებისა და კანონიერი ქურდების მიერ დამყარებული წესრიგი, თუმცა მისივე განცხადებით, ეს დრო არც ქუთაისში და არც საქართველოში არასდროს დაბრუნდება.
„ჩვენ არც იმას დავუშვებთ, რომ კანონიერი ქურდი ქურდად მომჯდარმა ხელისუფალმა ჩაანაცვლოს. კრიმინალების მძლავრობის დროს პატიოსან მოქალაქეს იმის იმედი მაინც რჩება, რომ სახელმწიფო ადრე თუ გვიან მოძლიერდება და აღკვეთავს უკანონობას, მაგრამ როდესაც თავად სახელმწიფო იქცევა როგორც ავაზაკთა ბანდა, ეს გაცილებით საშიში და დამანგრეველია ქვეყნისათვის“-განაცხადა ივანიშვილმა და აღნიშნა, რომ ხალხს ყველაზე მეტად უსამართლობა აწუხებს, რადგან ხელისუფლების ნაქები სასამართლო რეფორმა მთლიანად ჩავარდნილია.
ივანიშვილის შეფასებით, პრეზიდენტის ხელში მორჩილი სასამართლო ხალხის დაშინების ერთ-ერთი მთავარი ბერკეტია.
მისივე თქმით, ასე სამართლებრივი სახელმწიფო ვერ აშენდება. კოალიცია ხელისუფლებაში მოსვლის პირველივე დღეებიდან კი სასამართლოს ყოველგვარი წნეხისაგან გაათავისუფლებს.

როგორც „ქართული ოცნების“ ლიდერმა განაცხადა, ამას ბიუჯეტიდან ფული და ინვესტიციები არ სჭირდება, მისივე განმარტებით, საჭიროა პოლიტიკური ნება, რომელიც სააკაშვილის ხელისუფლებას არ აქვს.
„ჩვენ ასევე გავათავისუფლებთ პოლიციას პოლიტიკური დაკვეთებისაგან. იგი შეასრულებს თავის პირდაპირ დანიშნულებას. ის იქნება არა ხელისუფლების, არამედ ხალხისა და სახელმწიფოს სამსახურში. ამას არ სჭირდება დიდი ძალისხმევა და ბიუჯეტი, ეს ჩვენი პოლიტიკური ნებაა და ჩვენ ამას გავაკეთებთ“- აღნიშნა ივანიშვილმა და დასძინა, რომ როცა კოალიცია ხელისუფლებაში მოვა, წესრიგს დაამყარებს.
ივანიშვილის განმარტებით, ეს იქნება დემოკრატიაზე, სამართლის უზენაესობაზე და ადამიანის უფლებების პატივისცემაზე დამყარებული წესრიგი.