ქართული ოცნების ლიდერმა ბიძინა ივანიშვილმა ქუთაისში პარლამენტის ხარაჩოს ჩამონგრევის შედეგად გარდაცვლილის ოჯახს მიუსამძიმრა და აქციის  მონაწილეებთან ერთად წუთიერი დუმილით პატივი მიაგო გარდაცვლილის ხსოვნას.
„27 მაისს აქცია თბილისში სამძიმრით დავიწყეთ, და დღესაც ქუთაისში, სამძიმრის სიტყვებით გვიწევს ჩვენი შეხვედრის დაწყება. სამძიმარი ვუთხრათ გარდაცვლილის ოჯახს , სამძიმარი ვუთხრათ ერთმანეთს, რადგან კიდევ ერთი მსხვერპლი გვყავს, რადგან კიდევ ერთი ადამიანის სიცოცხლე შეეწირა სააკაშვილის ახირებებს“-განაცხადა ქუთაისში მიმდინარე აქციაზე “ქართული ოცნების“ ლიდერმა ბიძინა ივანიშვილმა.
მისივე თქმით, რამდენიმეწლიანი პროექტები რამდენიმე საათში უნდა განხორციელდეს, წინააღმდეგ შემთხვევაში შედეგი ყოველთვის ანალოგიური იქნება.
„სამწუხაროდ ეს არ არის ერთადერთი ტრაგედია. ყველას კარგად გვახსოვს რამდენიმე წლის წინ, იმ ადგილას შემზარავი ტრაგედია რომ დატრიალდა, როცა ძეგლის აფეთქებას დედა-შვილის დაღუპვა მოჰყვა. ძეგლებთან ომში საქართველომ მსხვერპლი განიცადა“-განაცხადა ივანიშვილმა.
„ქართული ოცნების“ აქცია ქუთაისში ბალახვანის მოედანზე ამ წუთებშიც მიმდინარეობს.