აღმოსავლეთ პარტნიორობის სამოქალაქო საზოგადოების ფორუმი საქართველოს ხელისუფლებას საპარლამენტო არჩევნების დემოკრატიულად ჩატარებისთვის შესაბამისი გარემოს შექმნისკენ მოუწოდებს.
შესაბამისი განცხადებით ფორუმის პირველი სამუშაო ჯგუფის მონაწილეებმა საქართველოს ხელისუფლებას უკვე მიმართეს.
განცხადებაში აღნიშნულია, რომ 2012 წლის ოქტომბრის საპარლამენტო არჩევნებს საქართველოს დემოკრატიული განვითარებისათვის გადამწყვეტი მნიშვნელობა აქვს.
„მართალია უკვე არსებობს იმის წინაპირობები, რომ მომავალი არჩევნები იქნება კონკურენტული, თუმცა, კიდევ რჩება გამოწვევები თავისუფალი და სამართლიანი არჩევნების ჩატარების კუთხით“ - ნათქვამია დოკუმენტში.
განცხადებაში ასევე საუბარია ქართული სამოქალაქო საზოგადოების კამპანიაზე, სახელწოდებით „ეს შენ გეხება“, რომლის მიზანი საარჩევნო კანონმდებლობისა და წინასაარჩევნო გარემოს გაუმჯობესებაა. დოკუმენტში აღნიშნულია, რომ კამპანიის მიერ შემუშავებული ბევრი წინადადება ეროვნულ კანონმდებლობაში 2012 წლის მაისში შეტანილ ცვლილებებში უკვე აისახა.
ფორუმის მიერ შემუშავებულ განცხადებაში ასევე აღნიშნულია, რომ ქართულმა არასამთავრობო და მედია ორგანიზაციებმა პარლამენტს დამატებითი საკანონმდებლო ცვლილებათა პაკეტიც წარუდგინეს, რომლის მიღების შემთხვევაში საქართველო დემოკრატიული არჩევნების ჩატარების გარანტი გახდება.
აღმოსავლეთ პარტნიორობის სამოქალაქო საზოგადოების ფორუმის პირველი სამუშაო ჯგუფის მონაწილეები მოუწოდებენ საქართველოს ხელისუფლებას, უზრუნველყოს პლურალისტული მედიის ხელმისაწვდომობა და თანაბარი სატელევიზიო ეთერი ყველა პოლიტიკური პარტიისათვის საარჩევნო პერიოდში, ასევე შექმნას ფორუმი პოლიტიკური დებატებისთვის, დახვეწოს ხმების დათვლის პროცედურა არჩევნების დღეს და დაარეგულიროს ადმინისტრაციული რესურსების გამოყენება.