პოლიტიკური მოძრაობა „ეროვნულების“ დაუზუსტებელი ინფორმაციით, გუშინ, ქუთაისში, მშენებარე პარლამენტის დამხმარე შენობის ნაწილის ჩამონგრევის შედეგად არა ერთი, არამედ სამი ადამიანი გარდაიცვალა.  
როგორც „ნიუსპრესს“ „ეროვნულების“ ერთ-ერთმა ლიდერმა შალვა ხაჭაპურიძემ განუცხადა, აღნიშნული ინფორმაცია მას ადგილობრივებმა მიაწოდეს, თუმცა, მის გადამოწმებას ორგანიზაცია ამჟამად ცდილობს.
ხაჭაპურიძის განმარტებით, ჩამონგრეულია არა შენობის ხარაჩო, როგორც ეს საქართველოს პრეზიდენტმა გუშინ აღნიშნა, არამედ შენობის ნაწილი, თავისი საყრდენებიანად.
მისი თქმით, აღნიშნულის დამადასტურებელი ფოტომასალა სოციალურ ქსელში მან ამ დილით გაავრცელა.
„ეროვნულები“ მომხდარში საქართველოს პრეზიდენტს ადანაშაულებს, ვინაიდან ხაჭაპურიძის განცხადებით, პარლამენტის მშენებლობა სწორედ სააკაშვილის ბრძანების საფუძველზე დააჩქარეს.
„ეროვნულების“ ლიდერის თქმით, ორგანიზაციის იურისტებმა უკვე დაიწყეს მუშაობა დოკუმენტზე, რომლითაც პარლამენტარებს სააკაშვილისგან გამიჯვნისა და მისი იმპიჩმენტის პროცედურის დაწყებისკენ მოუწოდებენ.
„ამის შემდეგ კი გენერალურ პროკურატურას მიხეილ სააკაშვილის, როგორც დამნაშავე პირის მიმართმ სისხლის სამართლის საქმის აღძვრას მოვთხოვთ“-განაცხადა ხაჭაპურიძემ.