კონტროლის პალატა პოლიტიკური კოალიცია „ქართული ოცნების“ ლიდერის ბიძინა ივანიშვილის მიმართ ადმინისტრაციული სამართალდარღვევის ოქმის შედგენასთან დაკავშირებით განმარტებებს აკეთებს.
კონტროლის პალატაში აცხადებენ, ბიძინა ივანიშვილს საკუთარი პარტიის დაფინანსების უფლება არ აქვს, ამიტომ ის ამისთვის თავისივე კუთვნილ კომპანიებს და შპს-ებს იყენებს.
კონტროლის პალატის ფინანსური მონისტორინგის სამსახურის ინფორმაციით, ბიძინა ივანიშვილს საქართველოში 60-მდე კომპანია აქვს, რომელთა უმრავლესობა ოფშორულ ზონებშია რეგისტრირებული და მათ საქართველოში ივანიშვილის ნათესავი კახა კობიაშვილი წარმოადგენს.
კობიაშვილი „ქართუ ჯგუფის“ აქციონერთა ჯგუფის ხელმძღვანელია. შესაბამისად, მათი ინფორმაციით, კობიაშვილი იმ კომპანიებს ხელმძღვანელობს, რომლებიც ივანიშვილის წინასაარჩევნო კამპანიას აფინანსებენ.
დღეს კონტროლის პალატაში კონკრეტული ფაქტების შესახებაც საუბრობდნენ, მათ შორის ერთი სატელიტურ მაუწყებელ „გლობალ ტვ“-ს ეხება.
კონტროლის პალატის მიერ გუშინ გავრცელებულ განცხადებაში აღნიშნულია, რომ მონიტორინგის სამსახური პოლიტიკური კოალიცია “ქართული ოცნების“ მიერ კომპანიების - “ბურჯის”, “ელიტა ბურჯის” და “გლობალ კონსალტინგ გრუპის” ტექნიკური, პერსონალური და სხვა საშუალებების პოლიტიკური და საარჩევნო მიზნებისთვის გამოყენების საკითხს სწავლობდა. საუბარია ელექტორატისთვის მასობრივად და უსასყიდლოდ ათეულათასობით სატელიტური ანტენების დარიგების და 239 ერთეული სხვადასხვა კლასის ავტომანქანით შეღავათიანი მომსახურების ფაქტებზე.
კონტროლის პალატა აცხადებს, რომ მონიტორინგის პროცესში მოიპოვეს მტკიცებულებები, რომლებიც პოლიტიკური კოალიციის მიერ საარჩევნო და პოლიტიკური მიზნებისთვის ზემოაღნიშნული კომპანიების მომსახურების კანონსაწინააღმდეგოდ გამოყენების ფაქტებს ადასტურებს.