პოლიტიკური კოალიცია „ქართული ოცნება“ მოსახლეობას მოუწოდებს ხელისუფლების მიერ დაგეგმილ პროვოკაციებს არ აჰყვეს.
როგორც „ქართული ოცნების“ მიერ გავრცელებულ განცხადებაშია ნათქვამი, კოალიციას მოქალაქეები უკავშირდებიან და ანონიმური სატელეფონო ზარების შესახებ ატყობინებენ, რომლითაც მათ “ქართული ოცნების” ოფისში, ვითომდა, საჩუქრების მისაღებად ეპატიჟებიან.
„კოალიცია აცხადებს, რომ ეს არის ხელისუფლების მიერ დაგეგმილი მორიგი ბინძური პროვოკაცია, ნაწილი ერთი დიდი გეგმისა, რომელიც მან ქუთაისში წამოიწყო და რომლის მიზანიც „ქართული ოცნების“ დისკრედიტაციაა. კოალიცია მოუწოდებს მოსახლეობას, არ აჰყვეს ხელისუფლების მიერ დაგეგმილ პროვოკაციას“ - ნათქვამია განცხადებაში.
კოალიცია საერთაშორისო და არასამთავრობო ორგანიზაციებს, უწყებათაშორის კომისიას და საქართველოს პროკურატურას აღნიშნული ფაქტებით დაინტერესებისა და სათანადო რეაგირების თხოვნით მიმართავს.