თურქეთის პარლამენტის დელეგაცია, კომიტეტების თავმჯდომარეთა შემადგენლობით, დღეს ოფიციალური ვიზიტით საქართველოს ეწვევა.

პარლამენტის პრესსამსახურის ინფორმაციით, დელეგაციის წევრებს ხვალ პარლამენტის სპიკერი დავით ბაქრაძე და პრემიერ-მინისტრი ნიკა გილაური შეხვდებიან.

ასევე, დაგეგმილია მათი შეხვედრები ქართველ კოლეგებთან, მათ შორის თავდაცვისა და უშიშროების კომიტეტის თავმჯდომარესთან გივი თარგამეძესთან, საგარეო ურთიერთობათა კომიტეტის თავმჯდომარესთან აკაკი მინაშვილთან, უცხოეთში მცხოვრებ თანამემამულეებთან ურთიერთობის კომიტეტის თავმჯდომარესთან ნუგზარ წიკლაურთან და იურიდიულ საკითხთა კომიტეტის თავმჯდომარესთან პავლე კუბლაშვილთან.

გარდა ამისა, შედგება თურქეთის რესპუბლიკასთან პარლამენტის მეგობრობის ჯგუფის წევრებთან შეხვედრა.

10 ივნისს დელეგაცია შსს-ს მომსახურების სააგენტოს ეწვევა.

დაგეგმილია დელეგაციის ვიზიტი ქუთაისსა და ბათუმში. ბათუმში სტუმრებს აჭარის ავტონომიური რესპუბლიკის მთავრობის თავმჯდომარე ლევან ვარშალომიძე მიიღებს.

11 ივნისს თურქეთის დელეგაციის წევრები ბათუმის იუსტიციის სახლს, გონიოს ციხეს და სარფის საბაჟო-გამშვებ პუნქტს დაათვალიერებენ.