საქართველოს პრეზიდენტის მიხეილ სააკაშვილის თქმით, განათლების სამინისტროს მიერ 7 წლის წინ დანერგილმა ერთიანმა ეროვნულმა გამოცდებმა უნივერსიტეტებში კორუფციის მაჩვენებელი ნულამდე დაიყვანა.
როგორც მიხეილ სააკაშვილმა მასწავლებლებთან შეხვედრისას აღნიშნა, გამოცდების შემოღება დიდი მიღწევა და ამავე დროს, რეფორმების დასაწყისი იყო.
„მაშინ სხვა გამოსავალი არ გვქონდა. სკოლები უმძიმეს მდგომარეობაში იყო. სკოლებში პედაგოგს ხელფასი 28 ლარი ჰქონდა, არ იყო გათბობა, ბევრგან არ იყო ფანჯრები. კარგად იცით რა მდგომარეობაში იყო სკოლები, თუმცა, ბევრი კიდევ საჭიროებს გაუმჯობესებას“ - განაცხადა პრეზიდენტმა.
მისი თქმით, მე-10, მე-11, მე-12 კლასის მოსწავლეები მხოლოდ ეროვნული გამოცდებისთვის ემზადებოდნენ. ამ ფაქტმა სკოლების დაცარიელება გამოიწვია, რაც განათლების ახალ მინისტრ დიმიტრი შაშკინთან ერთად შეიცვალა.
„დიმიტრი შაშკინმა და ყველა ჩვენგანმა ბავშვები სკოლაში დავაბრუნეთ. ამ მანდატით მოვიყვანე ეს კაცი. პირველი ჩვენი ამოცანა სწორედ ბავშვების სკოლაში დაბრუნება იყო. ფსევდოლიბერალური მიდგომით, რომ ბავშვმა რაც უნდა ის აკეთოს, არაფერი გამოვა. ბავშვს უნდა დაძალება, რომ ისწავლოს“ – განაცხადა სააკაშვილმა.
მისივე განმარტებით, თავისით არაფერი განვითარდება, რადგან ყველგან განვითარების შესაბამისი პოლიტიკაა საჭირო.
„ამიტომ, სკოლაში ატესტატები დავაბრუნეთ. მანამდე კი, დავაბრუნეთ მედლები, წახალისების სისტემა, ოლიმპიადები. ასევე, სკოლებში საატესტატო გამოცდები დავაბრუნეთ“- განმარტა სააკაშვილმა.
მისი თქმით, საქართველო მხოლოდ მშენებლობით, ტურიზმით და მომსახურების სექტორით ვერ განვითარდება.
„თუ ჩვენ ახალი ინდუსტრიები, ახალი საწარმოები არ შევქმენით, მითუმეტეს იმ პირობებში, როცა თავისუფალი ვაჭრობა გამოცხადდა, ვერ განვვითარდებით. ჩვენი პროდუქტი მსოფლიოში გადასახადების გარეშე შევა“- აღნიშნა პრეზიდენტმა.
მისივე ინფორმაციით, ამ ყველაფრის მიღწევა განათლებიდან იწყება, სწორედ ამიტომ შეიქმნა სკოლებში საატესტატო გამოცდები.
პრეზიდენტმა პედაგოგებს სასერტიფიკაციო გამოცდების ჩაბარებისკენ მოუწოდა და აღნიშნა, რომ გამოცდების ჩაბარების შემთხვევაში, მათი ხელფასი 1 000-დან 1 500 ლარამდე გაიზრდება.