ქართული მხარე მოხარული იქნება, თუ ოკუპირებულ რეგიონებში მცხოვრებ მოსახლეობას უცხოეთში, მათ შორის აშშ–ში გამგზავრება შეეძლება.
ამის შესახებ ჟურნალისტებს პარლამენტის ვიცე–სპიკერმა გიგი წერეთელმა აშშ–ს სახელმწიფო მდივნის განცხადების კომენტირებისას განუცხადა.
კლინტონმა დღეს ბათუმში სეპარატისტული რეგიონების მოსახლეობისთვის შეერთებულ შტატებში ჩასვლის გამარტივების შესახებ ისაუბრა.
„მოხარული ვიქნებით, თუ ოკუპირებულ რეგიონებში მცხოვრები ჩვენი თანამოქალაქეები ჩართული იქნებიან ძალიან ბევრ პროცესში, მათ შორის შეეძლებათ უცხოეთში გამგზავრება, აქ არ არის საუბარი სეპარატისტებზე“ - განაცხადა წერეთელმა.
მისი თქმით, კლინტონის განცხადება ეხმიანება და თანხვედრაშია საქართველოს ხელისუფლების მიერ დამტკიცებულ სახელმწიფო სტრატეგიასთან ოკუპირებული ტერიტორიების შესახებ - „ჩართულობა თანამშრომლობის გზით“. 
„აშშ მხარს უჭერს ამ სტრატეგიას, რომელიც გულისხმობს ადამიანებისთვის განვითარების საშუალების მიცემას, როგორც ეკონომიკური კუთხით, ისე განათლების თვალსაზრისით. რა თქმა უნდა, ეს გულისხმობს უფრო თავისუფალ გადაადგილებასაც“ – განაცხადა წერეთელმა.
მან მაგალითად მოიყვანა სახელმწიფოს მიერ მომზადებული ე.წ. ნეიტრალური პასპორტები.
„შეიქმნა მექანიზმი იმისთვის, რომ არსებობდეს დამატებითი ელემენტები თავისუფალი გადადგილებისთვის და სამოქალაქო უფლებების განხორციელებისთვის“ – აღნიშნა ვიცე-სპიკერმა.
ამასთანავე, წერეთელი აცხადებს, რომ თუ ვინმე კლინტონის განცხადებას აღიქვამს როგორც სეპარატისტული რეგონების არაპირდაპირ აღიარებას, ეს იქნება ტერმინებისა და პოზიციების სრული აღრევა.
წერეთლის თქმით, აშშ-ს ყველა, მათ შორის სახელმწიფო მდივნის დღევანდელი განცხადება მკაფიოდ საუბრობს რუსეთის ვალდებულებებზე, დეოკუპაციასა და საქართველოს ტერიტორიული მთლიანობის მხარდაჭერაზე.
როგორც ჰილარი კლინტონმა აღნიშნა, ის დღეს გამოაცხადებს იმ ეტაპებს, რომელიც სეპარატისტული რეგიონების სოფლების მაცხოვრებლებს აშშ–ში ვიზიტს გაუადვილებს, რაც კონფლიქტების მშვიდობიანი გზით მოგვარების საქმეში წინგადადგმული ნაბიჯი იქნება.