ექსპერტი პოლიტიკურ საკითხებში გია ხუხაშვილი მიიჩნევს, რომ პოლიტიკური კოალიცია „ქართული ოცნების“ საქართველოში აშშ-ს საელჩოსთვის მიმართვა დეკლარაციული ხასიათის იყო.
როგორც ხუხაშვილმა დღევანდელ პრესკონფერენციაზე განმარტა, კოალიცია ჰილარი კლინტონთან ბიძინა ივანიშვილის შეხვედრას მოითხოვდა და ეს ნორმალურია.
„როდესაც შეხვედრაში სამი პოლიტიკური ერთეული მონაწილეობს, საიდანაც ორი ფაქტიურად ხელისუფლებაშია ინტეგრირებული, მსგავსი ტიპის შეხვედრაში პირადად ივანიშვილის მხრიდან მონაწილეობა გაუგებარი იქნებოდა“ - განმარტა ხუხაშვილმა.
მისი თქმით, ივანიშვილი ოპოზიციურ პოლიტიკურ პარტიებს თავის სახელებს არქმევს და რაც მთავარია, ამას აგრესიული ფორმით არ აკეთებს.
„მე მის მოსაზრებებს ვიზიარებ, თუმცა, აშშ-ს ფაქტორის მიმართ პატივისცემიდან გამომდინარე, კოალიცია ამ შეხვედრაზე წარმოდგენილია. ვფიქრობ, რომ ამ ყველაფერს ამერიკელებიც გაგებით ეკიდებიან“ - აღნიშნა ხუხაშვილმა.
რაც შეეხება სხვა პოლიტიკურ პარტიებს, ექსპერტმა განმარტა, რომ კლინტონთან შეხვედრაზე სასურველი იყო ოპოზიციის ფართო სპექტრი ყოფილიყო წარმოდგენილი.
„ჰილარი კლინტონის ვიზიტის პროტოკოლური ნაწილის დაგეგმვაში საქართველოს ხელისუფლებაც მონაწილეობდა. მათზე რომ ყოფილიყო დამოკიდებული ამ შეხვედრაზე კოალიციის წარმოდგენის საკითხი, ხელისუფლება ამის წინააღმდეგი იქნებოდა, მაგრამ საამისოდ არგუმენტები არ ჰქონდათ“ - განაცხადა ხუხაშვილმა და აღნიშნა, რომ ასეთ შემთხვევაში, ისინი მაგალითად, კახა კუკავასა და ნინო ბურჯანაძესთან შეხვედრაზე გააკეთებდნენ აქცენტს, მაგრამ ამაზე ხელისუფლების მოთხოვნის წილი უფრო მაღალი იყო, ვიდრე ჰილარი კლინტონის სურვილი.