პარლამენტის ოპოზიციონერმა დეპუტატმა ჯონდი ბაღათურიამ, დღევანდელ პლენარულ სხდომაზე, კვლავ დააყენა პრეზიდენტის იმპიჩმენტის საკითხი და უმრავლესობის და უმცირესობის წევრებს საჭირო პროცედურების დასაწყებად მხარდჭერისკენ მოუწოდა.

ბაღათურიას განცხადებით, პრეზიდენტის იმპიჩმენტის მხარდაჭერა თითოეული დეპუტატისთვის ბილეთია ახალ საქართველოში, სადაც არ იქნება სააკაშვილის რეჟიმი.

იმპიჩმენტის საფუძვლად დეპტუტატმა პრეზიდენტის ჩართულობა კორუფციაში, არადეკლარირებული შემოსავლების არსებობა, უკანონოდ მითვისებული ქონება და ასევე, სააკაშვილის ოჯახის წევრების მიერ უკანონოდ მოპოვებული ქონება დაასახელა. ეს ყოველივე, დეპუტატის განცხადებით, პრეზიდენტის წინააღმდეგ სისხლის სამართლის საქმის აღძვრის საფუძველია.

ამასთან, სხდომაზე მან განაცხადა, რომ ბათუმი საერთაშორისო ტრეფიკინგის ცენტრად გადაიქცა, სადაც თურქეთის მოქალაქეებს პროსტიტუციაში ჩართული ჰყავთ შუა აზიიდან ჩამოყვანილი გოგონები.

,,ბოლო დროს პრეზიდენტის უტაქტობამ და უწესობამ ზღვარს გადააჭარბა, მან თავი გამოაცხადა პრომეთედ და განაცხადა, რომ ჯანდაცვა ხალხს მისცა. სააკაშვილმა ჯანდაცვა გადააბარა მამამისს, ხოლო განათლების სისტემა გადააბარა დედამისს, ბენდუქიძეს და შაშკინს“-განაცხადა ბაღათურიამ.

ოპოციონერი დეპუტატის ამ გამოსვლას ვიცე-სპიკერის გიგი წერეთლის ხუმრობა მოჰყვა, რომელმაც აღნიშნა, რომ დეპუტატებმა უნდა იჩქარონ ახალ საქართველოში, რადგან ბილეთების რაოდენობა შეზღუდულია.