მიხეილ სააკაშვილმა ევროპის კვირეულის მონაწილეები პრეზიდენტის სასახლეში მიიღო.
პრეზიდენტმა მათ სიტყვით მიმართა, დემოკრატიულ ფასეულობებზე ისაუბრა და საქართველოსა  და ევროკავშირს შორის მოლაპარაკების პროცესს შეეხო.
მისი თქმით, ევროპის კვირეული ყოველ წელს სულ უფრო ფართომასშტაბიანი და საინტერესო ხდება, რადგან საქართველო ევროპის შემადგენელი ნაწილია.
„მაშინ, როდესაც ხალხი ევროკავშირის დროშას უყურებდა, მას ეგონა, რომ ახალი საელჩო გაიხსნა - ხელისუფლებაში მოსვლის შემდეგ, უპირველესად, ეს დროშა ავწიეთ და ბავშვებს ევროპული ჰიმნი მოვასმენინეთ“- განაცხადა პრეზიდენტმა და აღნიშნა, რომ ამ ფაქტმა ევროპელი მინისტრები და სახელმწიფოების მეთაურები გააოცა და ზოგიერთმა მათგანმა ამასთან დაკავშირებით პროტესტიც გამოთქვა.
„ისინი ფიქრობდნენ, რომ ჩვენ ამით ვტრაბახობდით, რადგან ვერ ხვდებოდნენ თუ რატომ ფრიალებდა ეს დროშა აქ - ამ ღარიბ, სასოწარკვეთილ ქვეყანაში. 2008-09 წლებამდე საქართველოს ევროპულ პრესაში „პატარა“, „ღარიბ“ და „კორუმპირებულ“ ქვეყნად მოიხსენიებდნენ“- განაცხადა სააკაშვილმა.
მისივე თქმით, ახლა ევროკავშირში ინტეგრაციის გაზაზე საქართველო წინ მიიწევს ბევრად უფრო სწრაფად, ვიდრე ეს ვინმეს წარმოედგინა. როგორც პრეზიდენტმა აღნიშნა, რამდენიმე დღეში ევროკავშირის ქვეყნებთან ვიზების ლიბერალიზაციასა და უვიზო მიმოსვლის თაობაზე სამოქმედო გეგმაც გამოცხადდება.
მისივე განმარტებით, ევროკავშირის კვლევების თანახმად, საზღვრების კონტროლის თვალსაზრისით, საქართველო ერთ-ერთი ყველაზე განვითარებული ქვეყანაა ევროპის მასშტაბით და მალე ევროკავშირთან საქართველოს უვიზო მიმოსვლა ექნება.
„უკვე დაიწყო ლაპარაკი იმის თაობაზე, რომ საქართველო უნდა გახდეს ევროკავშირის წევრი.ბოლო თვეების განმავლობაში ეს სულ უფრო ხშირად მესმის ევროპელი ლიდერებისგან და ამას უკვე ჩვენც ვეჩვევით. ეს ძალიან დიდი ცვლილებაა - თაობებისა და ასწლეულების ოცნება საქართველოსთვის“- აღნიშნა პრეზიდენტმა.
მისივე თქმით, საქართველო შეიცვალა და ეს ცვლილება მხოლოდ ეკონომიკურ მაჩვენებლებით არ აისახება. სააკაშვილის განმარტებით, როდესაც იგი პრეზიდენტი გახდა, ქვეყნის მთლიანი შიდა პროდუქტი დაახლოებით, 1200 ამერიკულ დოლარს შეადგენდა, მაგრამ მომდევნო წლის დამლევს ამ მაჩვენებელმა 6 ათას აშშ დოლარს მიაღწია.
მისი თქმით, ეს ჯერ კიდევ დაბალი შემოსავალია, მაგრამ საქართველო ღარიბი ქვეყნების სიაში უკვე აღარაა.
პრეზიდენტმა აღნიშნა, რომ მაშინ სიღრიბის მაჩვენებელი 53 პროცენტი იყო, ახლა კი ის 18 პროცენტამდე შემცირდა.
როგორც სააკაშვილმა განაცხადა, სიღარიბის ზღვარს მიღმა მყოფ მოსახლეობას უკვე სამედიცინო დაზღვევა და მინიმალური სოციალური დახმარება აქვს.