პარლამენტის საფინანსო–საბიუჯეტო კომიტეტმა დღეს მეორე მოსმენით მხარი დაუჭირა „საგადასახადო კოდექსში“ ცვლილებების და „ნებაყოფლობით ინდივიდუალური დაზოგვის შესახებ“ მთავრობის მიერ ინიცირებულ საკანონმდებლო პაკეტს.
ინიციატივა 2013 წლიდან საშემოვლო გადასახადის 20–დან 18%–მდე შემცირების შემდეგ, ფიზიკური პირის შემოსავლის გამოთავისუფლებული 2%–ის დანაზოგის სახით დაგროვებას გულისხმობს აქტივების მმართველ კომპანიებში.
იმ შემთხვევაში, თუ დასაქმებული ფულის გადარიცხვაზე უარს იტყვის, თანხა ბიუჯეტში დარჩება.
პროექტში გათვალისწინებულია აქტივების მმართველი კომპანიის შერჩევის კრიტერიუმები.
როგორც განხილვაზე მთავრობის საპარლამენტო მდივანმა გია ხუროშვილმა აღნიშნა, ტენდერში მხოლოდ მაღალი საერთაშორისო რეპუტაციის მქონე კომპანიები შეძლებენ მონაწილეობას. ამასთანავე, აქტივების მმართველმა კომპანიამ, რომელიც შესაძლოა საქმიანობდეს როგორც საქართველოში, ისე მის ფარგლებს გარეთ, მაქსიმალური თანამონაწილეობა უნდა უზრუნველყოს.
„კონკურენციის უზრუნველყოფის მიზნით, ბაზარზე უნდა მოქმედებდეს მინიმუმ 3 კომპანია“ - აღნიშნა ხუროშვილმა.
მისი თქმით, კანონპროექტის თანახმად, ფიზიკური პირები დანაზოგის მიღებას 15 წლის შემდეგ შეძლებენ. ამასთანავე, მან განაცხადა, რომ დანაზოგთან ერთად მოქალაქეებს შეუნარჩუნდებათ სახელმწიფოს მიერ საპენსიო და სოციალური დახმარების უზრუნველყოფაც.
კომიტეტის თავმჯდომარის მოადგილემ, „ეროვნულ–დემოკრატიული პარტიის“ წევრმა გურამ ჩახვაძემ აქტივების მმართველი ახალი კომპანიების შერჩევის ნაცვლად, მთავრობას სადაზღვევო კომპანიების გამოყენება და დაგროვებით საპენსიო სქემაზე გადასვლა შესთავაზა.