„სახალხო კრება“ საერთაშორისო ორგანიზაციების მხრიდან, საქართველოში ადამიანის უფლებების დარღვევათა ფაქტების ობიექტურ შეფასებას მიესალმება.

როგორც დღეს გამართულ პრესკონეფერციაზე „სახალხო კრების“ ადამიანის უფლებათა დაცვისა და ეროვნულ უმცირესობათა საკითხების შემსწავლელი კომისიის ხელმძღვანელმა თემურ ლომსაძემ განაცხადა, განსაკუთრებით მისასალმებელია ამერიკის შეერთებული შტატების ელჩის ჯონ ბასის განცხადება, სადაც ის ქართულ მედიაში არსებულ პრობლემებსა და გამოწვევებზე, სასამართლო და სასჯელაღსრულების სისტემებში არსებულ სერიოზულ პრობლემებზე საუბრობს.

„ერთი წელი გავიდა მას შემდეგ, რაც 2011 წლის 26 მაისის ღამეს, რუსთაველის გამზირზე ”სახალხო კრების” მიერ ორგანიზებული აქციის დაშლისას, მოხდა მშვიდობიანი მომიტინგეების სისხლიანი დარბევა. აქციაზე სამსახურებრივი მოვალეობის შესასრულებლად მისული 20-ზე მეტი ჟურნალისტი დაზარალდა, უხეშად დაირღვა მათი უფლებები“ - განაცხადა მან.

ლომსაძის შეფასებით, ამ დღეს ყველა საერთაშორისო სამართლებრივი აქტი, კონვენცია, შეთანხმება, ასევე საქართველოს კონსტიტუცია დაირღვა.

მისი თქმით, მიუხედავად „სახალხო კრების“ და ყველა საერთაშორისო ორგანიზაციის, მოთხოვნისა - ჩატარებულიყო ობიექტური გამოძიება 2011 წლის 26 მაისის მოვლენებთან დაკავშირებით, საქართველოს ხელისუფლება მხოლოდ შსს-ს ე.წ. დახურული შიდა მოკვლევით დაკმაყოფილდა.

„სამწუხაროდ, დიდი გულისტკივილით გვინდა ავღნიშნოთ, რომ ყოველივე ამაზე ამერიკის ელჩს არანაირი კომენტარი არ გაუკეთებია. ერთი წლის წინ, ჯონ ბასს, 2011 წლის 26 მაისის მოვლენებისათვის, რომ ობიექტური შეფასება მიეცა, დარწმუნებული ვართ, ქვეყანაში არ იქნებოდა ის მდგომარეობა რაც დღეს არის - სასჯელაღსრულების დაწესებულებებში პატიმრების მდგომარეობა უმძიმესია, ბოლო ერთი წლის განმავლობაში, პრაქტიკულად გაურკვეველ ვითარებაში 146 პატიმარია დაღუპული, მხოლოდ ორი თვის განმავლობაში ხელისუფლების მხრიდან ჟურნალისტებზე ზეწოლის 30-ზე მეტი ფაქტია დაფიქსირებული და არც ერთი მათგანი არ არის გამოძიებული“ - განაცხადა მან.

„სახალხო კრება“ მოუწოდებს, საერთაშორისო ორგანიზაციებს და დიპლომატიური კორპუსის წარმომადგენლებს უფრო აქტიურად შეისწავლონ და განახორციელონ მონიტორინგი ხელისუფლების ანტიდემოკრატიულ ქმედებებზე და ობიექტური ანგარშის გამოქვეყნებით ხელი შეუწყონ ქვეყანაში სამართლიანი წინა საარჩევნო გარემოს შექმნას.

მათი შეფასებით, საქართველოში ავტორიტარული რეჟიმია, რომელიც ყოველდღიურად მიდის დიქტატურისაკენ და რომელსაც დემოკრატიასთან არაფერი არ აქვს საერთო.