პოლიტიკური კოალიცია „ქართული ოცნების“ მხარდამჭერებმა ათენში აქცია გამართეს.
თბილისში 27 მაისს ჩატარებულ ფართომასშტაბიან  აქციას საბერძნეთში მცხოვრები ქართველებიც გამოეხმაურნენ და ათენის ქუჩებში ფეხით მსვლელობა მოაწყვეს.
აქციის მონაწილეებს „ქართული ოცნების“ მაისურები ეცვათ და კოალიციის დროშები და ტრანსპარანტები ეჭირათ წარწერით - „სააკაშვილს არავითარი იდეოლოგია არ გააჩნია“, „გავერთიანდეთ მონატრებული სამშობლოს გადასარჩენად“ და სხვა.
აქციის მონაწილეებს ათენში გასტროლებზე მყოფი „ქართული ხმების“ წევრებიც შეუერთდნენ.
„ქართული ოცნების“ ინფორმაციით, საბერძნეთში მცხოვრები მხარდამჭერები მსვლელობის შემდეგ, კინოთეატრში შეიკრიბნენ და თბილისში მიმდინარე აქციას დიდ ეკრანზე პირდაპირ ეთერში ადევნებდნენ თვალს.
პირდაპირი ეთერის ჩართვამდე „ქართულმა ხმებმა“ სცენაზე „მრავალჟამიერი“ შეასრულა.
„ქართული ოცნების“ ფართომასშტაბიანი აქცია თბილისში, 27 მაისს, თავისუფლების მოედანზე გაიმართა.