ოპოზიციონერი დეპუტატი, „ქართული დასის“ ლიდერი ჯონდი ბაღათურია „ტრადიციონალისტთა“ ლიდერთან აკაკი ასათიანთან  რაიმე სახის პოლიტიკური კონსულტაციების წარმოებას უარყოფს.
როგორც დღეს ბაღათურიამ ჟურნალისტებს განუცხადა, მას არანაირი დიალოგი აკაკი ასათიანთან არ ჰქონია და არც მომავალში აპირებს.
მედიაში გავრცელებული ინფორმაციით, ჯონდი ბაღათურია აკაკი ასათიანთან და „სახალხო კრებასთან“ ერთად, ახალი პოლიტიკური გაერთიანების ჩამოყალიბებას გეგმავს.
ამასთანავე, ბაღათურია აცხადებს, რომ „ქართულ დასს“ კოლეგიალური ურთიერთობა აქვს როგორც „სახალხო კრებასთან“, ისე „ქართულ ოცნებასთან“.
დეპუტატი მიიჩნევს, რომ უმჯობესია შეიქმნას ერთიანი ოპოზიციური ფრონტი – „ერთი დიდი საარჩევნო ბულდოზერი, რომელიც პოლიტიკურ მოედანს დაგროვილი ნაგვისგან გაწმენდს“.