საქართველოს პრეზიდენტი მიიჩნევს, რომ პარლამენტის ქუთაისში გადატანით, თბილისში მცხოვრებმა გარკვეულმა ჯგუფებმა პოლიტიკური ძალაუფლება დაკარგეს.
როგორც მან დღეს ახალი კლინიკის გახსნისას განაცხადა, პარლამენტის ქუთაისში გადატანამდე, საქართველოს პოლიტიკურ ბედს ერთ ქუჩაზე მცხოვრები გარკვეული ჯგუფი წყვეტდა.
მისივე თქმით, იმ ერთი ჯგუფის ხელში იყო პარლამენტი, ყველა უნივერსიტეტი და ყველა საავადმყოფო, ასევე, გამსახურდიას პრეზიდენტად არჩევის შემდეგ, სწორედ მათ გადაწყვიტეს ხელისუფლების დამხობა, დანარჩენი თბილისი კი, აღნიშნულ პროცესებში არ ერეოდა.
„ჩვენ პოლიტიკური ძალაუფლება გამოვტაცეთ ერთსა და იმავე ქუჩაზე მცხოვრებ ერთსა და იმავე ხალხს, ცხვირაწეულებს, რომლებსაც არ უყვართ არავინ და მუდამ ზემოდან ქვემოთ დაჰყურებენ თავის ხალხს. ყველაფრი წყდებოდა იმ ქუჩაზე, სამოქალაქო ომიც კი. ეს არასდოს არ უნდა დაბრუნდეს საქართველოში“ - განაცხადა სააკაშვილმა.
მისივე თქმით, ოპონენტები, რომლებიც ამბობენ, რომ პარლამენტი თბილისში მალე დაბრუნდება, ცდებიან, რადაგან ახალი პარლამენტი ახალი საქართველოს სიმბოლოა და მშენებლობის პროცესს წინ ვერაფერი აღუდგება.

როგორც პრეზიდენტმა აღნიშნა, ამიერიდან ყველა თანასწორი იქნება - პრეზიდენტიც, მინისტრებიც, მილიონრებიც და ქუთაისის მაცხოვრებლებიც. ისინი ერთნაირ კლინიკებში იმკურნალებენ, ერთნაირ სამედიცინო მომსახურებას მიიღებენ და თანაბარ პირობებში იცხოვრებენ.