პარლამენტის ვიცე-სპიკერი მიხეილ მაჭავარიანი მიიჩნევს, რომ სერბეთის პრეზიდენტის ტომისლავ ნიკოლიჩის განცხადება აფხაზეთთან და ცხინვალის რეგიონთან დაკავშირებით, რუსეთისთვის გადახდილი ხარკია.
სერბეთის პრეზიდენტმა რამდენიმე დღის წინ განაცხადა, რომ სერბეთის პარლამენტმა შესაძლოა, აფხაზეთისა და სამხრეთ ოსეთის დამოუკიდებლობის აღიარების საკითხი განიხილოს.
„ვთვლი, რომ ტომისლავ ნიკოლიჩი არის იმ პოლიტიკური ჯგუფის მიმდევარი, რომელიც რუსეთზე ორიენტირებულად ითვლება. სწორედ ამიტომ აქვს მის პარტიას ხელშეკრულება „ედინაია როსიასთან“ და ეს განცხადება გარკვეულწილად, ხარკის გადახდა იყო იმ პოლიტიკისთვის, რასაც რუსეთთან ურთიერთობა ჰქვია“ – განაცხადა მაჭავარიანმა ჟურნალისტებთან საუბრისას.
მისი თქმით, ნიკოლიჩის მიერ ჩამოყალიბებული კონფიგურაცია გაუგებარი და მიუღებელია, რადგან ამასთანავე ის აღნიშნავს, რომ სერბეთი ევროკავშირისკენ სვლას გაარძელებს.
როგორც მაჭავარიანმა აღნიშნა, ქართული მხარე გააგრძელებს მუშაობას სერბეთთან, ისევე როგორც სხვა სახელმწიფოებთან, რათა აფხაზეთისა და ცხინვალის რეგიონის არაღიარების პოლიტიკა გაგრძელდეს.
„ჩვენ მივაწვდით ძალიან დეტალურ ინფორმაციას და თუ სერბეთი ამაზე მაინც წავიდა, ეს ნიშნავს, რომ მან საბოლოოდ ხელი ჩაიქნია კოსოვოზე და არა მგონია ეს ნიკოლიჩის გეგმებში შედიოდეს“ – განაცხადა დეპუტატმა.
ასევე, მან ხაზი გაუსვა, რომ საქართველო არ აღიარებს კოსოვოს დამოუკიდებლობას.