პოლიტიკური პარტია „თავისუფალი საქართველო“ ყველა ოპოზიციურ აქტივობასა და აქციას მიესალმება. ამის შესახებ „ნიუსპრესს“ პარტიის ლიდერმა კახა კუკავამ განუცხადა.
მისი თქმით „თავისუფალი საქართველო“ სოლიდარულია „ქართული ოცნების“ და ყველა ოპოზიციური პარტიის საქმიანობის მიმართ.
როგორც კუკავამ აღნიშნა, „ქართულ ოცნებასთან“ თანამშრომლობას არ გამორიცხავს და „თავისუფალ საქართველოს“ მიუღებელი პოზიცია არცერთ პოლიტიკურ ძალასთან მიმართებაში არ აქვს.
„ვითანამშრომლებთ იმ დოზით, რა დოზითაც თვითონ ექნებათ თანამშრომლობის სურვილი. ბევრ პრინციპულ საკითხზე გვაქვს სხვადასხვა პარტიებთან განსხვავება, მაგრამ იმ პარტიებთან, რომლებიც სააკაშვილის შეცვლის საკითხში ჩამოყალიბებული არიან, ოპოზიციის თანამშრომლობა აუცილებელია. ამიტომ, თუ თვითონაც ამ პოზიციას გაიზიარებენ, ვერანაირ ბარიერს თანამშრომლობისთვის ვერ ვხედვათ“- აღნიშნა კუკავამ.
მისივე თქმით, პარტიას არაერთხელ გამოუთქვამს მზადყოფნა „ქართულ ოცნებასთან“ თანამშრომლობისთვის, მათ შორის საარჩევნო კოალიციის ფორმატშიც.
თუმცა, კუკავას განმარტებით, კოალიციაში შემავალ „რესპუბლიკურ პარტიას“ „თავისუფალ საქართველოსთან“ დაკავშირებით კატეგორიული პოზიცია აქვს და მას პრორუსულ ძალად მიიჩნევს.
„თავისუფალი საქართველოს“ ლიდერის განცხადებით, სამწუხაროდ, „რესპუბლიკური პარტიის“ აღნიშნულ პოზიციას კოალიციის ლიდერი ბიძინა ივანიშვილიც იზიარებს.