პოლიტიკურ კოალიცია „ქართულ ოცნებაში“ ჯერჯერობით არ ფლობენ ინფორმაციას, გაიმართება თუ არა შეხვედრა ამერიკის  სახელმწიფო მდივანს ჰილარი კლინტონსა და კოალიციის ლიდერს ბიძინა ივანიშვილს შორის.
როგორც „ნიუსპრესს“ კოალიციის პრესსპიკერმა მაია ფანჯიკიძემ განუცხდა, ჰილარი კლინტონის საქართველოში ვიზიტის თარიღი მხოლოდ დღეს გახდა ცნობილი და სხვა დეტალები გარკვეული არ არის.
„ჯერჯერობით, ეს ამბავი ძალიან ახალია. დღეს გახდა ცნობილი, რომ იგი 5 ივნისს ჩამოვა, ამიტომ, ჯერჯერობით კლინტონის პროგრამის არანაირი დეტალი არ ვიცი და ვერაფერს გეტყვით“- აღნიშნა ფანჯიკიძემ.
ჰილარი კლინტონი საქართველოს 5 ივნისს ეწვევა. ამის შესახებ ინფორმაციას აშშ-ს სახელმწიფო დეპარტამენტის ოფიციალური ვებ-გვერდი ავრცელებს. მათივე ცნობით, კლინტონი ბათუმში აშშ-საქართველოს სტრატეგიული პარტნიორობის კომისიის პლენარულ სხდომას გახსნის. ამასთან, ის საქართველოში ვიზიტის ფარგლებში პრეზიდენტ მიხეილ სააკაშვილს, პოლიტიკოსების ფართო წრესა და სამოქალაქო სექტორის წარმომადგენლებს შეხვდება.
ჰილარი კლინტონი საქართველოში სომხეთიდან ჩამოვა, 6 ივნისს კი - იგი უკვე აზერბაიჯანს ეწვევა.