კოალიცია „ქართული ოცნების“ ლიდერი ბიძინა ივანიშვილი არ აკონკრეტებს, აპირებს თუ არა „დემოკრატიული მოძრაობა-ერთიანი საქართველოს“ ლიდერთან  ნინო ბურჯანაძესთან თანამშრომლობას.
სამებაში მყოფმა ივანიშვილმა, ჟურნალისტების შეკითხვაზე - აპირებს თუ არა ეს ორი ძალა გაერთიანებას, კონკრეტული პასუხი არ გასცა.
„ჩვენ არ გვყავს არც ერთი ქართველი დასაკარგი, ეს ჩვენი პოზიციაა. ყველასთან უნდა შევძლოთ თანამშრომლობა, თუმცა, ეს იმას არ ნიშნავს, რომ ჩვენ აუცილებლად უნდა გავერთიანდეთ“ - განაცხადა ბიძინა ივანიშვილმა.
ივანიშვილი, რომელიც სამებაში გასული წლის 26 მაისის აქციის დაშლის დროს დაღუპულთა მოსახსენიებელ ღვთისმსახურებას დაესწრო, ბურჯანაძესთან მივიდა, ხელი ჩამოართვა და მიუსამძიმრა. აღნიშნულ ფაქტს, სამებაში პარაკლისზე შეკრებილების აპლოდისმენტები მოჰყვა.
კოალიციასა და ბურჯანაძეს შორის გაუგებრობა რამდენიმე თვის წინ წარმოიშვა, როცა ბიძინა ივანიშვილმა „სახალხო კრებისა“ და „ქართული აკადემიის“ წევრებთან შეხვედრაზე ბურჯანაძის მისამართით აღნიშნა, რომ თუ ადამიანი საერთო საქმეს ვერ ეხმარება, ისეთი პოზიცია უნდა აირჩიოს, რომ ის არ დააზიანოს მაინც. ამის შემდეგ ორივე მხარის მიერ სხვადასხვა შინაარსის ურთიერთკრიტიკული განცხადებები გაკეთდა.