„ახალი მემარჯვენეების“ ყოფილ წევრს დავით საგანელიძეს კოალიცია „ქართულ ოცნებაში“ გაწევრიანებისკენ დღევანდელი რეალობის ადეკვატურმა

 აღქმამ უბიძგა. ამის შესახებ „ნიუსპრესს“ ექსპერტმა სოსო ცისკარიშვილმა განუცხადა.
მისი განმარტებით, საგანელიძემ საკუთარი პოზიცია საზოგადოებას დამაჯერებლად და არგუმენტირებულად გააცნო და კითხვები აღარ რჩება, თუ რატომ დატოვა მან „ახალი მემარჯვენეების“ რიგები.
„დღევანდელი რეალობის ადეკვატურმა აღქმამ მეოცნებეთა რიგებში გაწევრიანებისკენ მას სრულიად სამართლიანად უბიძგა, რადგან თავად საგანელიძე არავისზე ნაკლები მეოცნებე არ გახლავთ“ - განაცხადა ცისკარიშვილმა.
რაც შეეხება ტენდენციას, თითქოს კოალიციის გარეთ დარჩენილი პარტიების დაშლა და ამ ერთ ძალაში გაწევრიანება ხდება, ცისკარიშვილის აზრით, ამის საფრთხე არ არსებობს.
„კოალიციის მიზანი არ არის რომელიმე პარტიისთვის ზიანის მიყენება, მათი სამიზნე მხოლოდ დღევანდელი მმართველი პარტიაა. ამ ზიანს კი, „ნაციონალურ მოძარობას“ არა რომელიმე პოლიტიკური ძალა, არამედ ქართველი ხალხი მიაყენებს“ - განაცხადა მან.
ასევე, ცისკარიშვილი მიიჩნევს, რომ არჩევნების შემდეგ ერთპარტიულ პარლამენტზე საუბარი ნაადრვია, რადგან კოალიცია, უკვე შვიდ სხვადასხვა პარტიას აერთიანებს და ის პარლამენტში ერთპარტიული ვერ იქნება.
დავით საგანელიძემ „ახალი მემარჯვენეებიდან“ წასვლის შესახებ გუშინ განაცხადა. მან საკუთარი კანდიდატურა კოალიცია „ქართულ ოცნებას“ შესთავაზა.