„სახალხო კრების“ აღმასრულებელი საბჭოს წევრები დღეს, სამების საკათედრო ტაძარში, 2011 წლის 26 მაისს გარდაცვლილთა სულის მოსახსენიებელ პანაშვიდს დაესწრებიან.

როგორც „ნიუსპრესს“ „სახალხო კრებიდან“ აცნობეს, 12:00 საათზე სამების ტაძარში უწმინდესისა და უნეტარესის, სრულიად საქართველოს კათოლიკოს-პატრიარქის ილია II-ის ლოცვა-კურთხევით, აქციაზე დაშავებულთა და დაპატიმრებულთათვის პარაკლისი აღევლინება.

პარაკლისზე დასწრების მსურველები 11:00 საათიდან სამების ტაძრის ეზოში შეიკრიბებიან.

2011 წლის 26 მაისს, რუსთაველის გამზირზე „სახალხო კრების“ ორგანიზებით საპროტესტო აქცია გაიმართა. აქციის მონაწილეთა მოთხოვნა იყო პრეზიდენტ მიხეილ სააკაშვილის გადადგომა და ვადამდელი საპრეზიდენტო და საპარლამენტო არჩევნების დანიშვნა.

შეკრებილები შსს-ს სპეცდანიშნულების რაზმებმა ძალისმიერი გზით დაარბიეს. აქციის დაშლის დროს, რამდენიმე მოქალაქე გარდაიცვალა და ასეულობით დაშავდა.