საქართველოში დემოგრაფიული სურათის რადიკალურ შეცვლას და ლაზიკას გეგმებს ემსახურება ცვლილებები, რომლის თანახმად, სახელმწიფო სამსახურში უცხოეთში მცხოვრები თანამემამულის სტატუსის მქონე პირის დასაქმება ხდება შესაძლებელი.
აღნიშნულის თაობაზე დღეს ოპოზიციონერმა დეპუტატმა, საპარლამენტო ფრაქცია „ერთობა სამართლიანობისთვის“ თავმჯდომარემ დიმიტრი ლორთქიფანიძემ, ადამიანის უფლებათა დაცვის და სამოქალაქო ინტეგრაციის კომიტეტის სხდომის შემდეგ განაცხადა.
სხდომაზე „საჯარო სამსახურის შესახებ“ კანონში ცვლილებების პროექტი, რომელიც დიასპორის საკითხებში სახელმწიფო მინისტრის მოადგილემ ირაკლი ნადირაძემ წარმოადგინა, პირველი მოსმენით დამტკიცდა.
„საუბარია არა მხოლოდ იმ პირებზე, ვინც საქართველოში დაიბადა და საქართველოს მოქალაქე იყო, არამედ, უცხოეთში მცხოვრებ თანამემამულის სტატუსით შეუძლია ისარგებლოს პირმა, ვინც კავკასიური ენების ჯგუფს განეკუთვნება. ესენი არიან ჩრდილოეთ კავკასიის ხალხები, რომლებიც სხვადასხვა სახელმწიფოებში ცხოვრობენ“ – აღნიშნა ლორთქიფანიძემ.
მისი თქმით, ამ პირებს საჯარო მოხელის ვაკანტურ თანამდებობაზე საქართველოში დასაქმებისა და დასახლების უფლება ექნებათ.
„ეს არის განზრახული მომავალი ლაზიკისთვის. მექმნება შთაბეჭდილება, რომ ვიღაც ცდილობს საქართველოში დემოგრაფიული სურათის რადიკალურ შეცვლას. ეს გეგმები მიზნად ისახავს მონოეთნიკური ქართველი ერის პოლიტიკურ ერად გადაქცევას, რაც მომავალი არჩევნების მართვის კარგი საშუალება იქნება“ – განაცხადა ლორთქიფანიძემ.
კანონპროექტის თანახმად, უცხოეთში მცხოვრები თანამემამულის სტატუსის მქონე პირი, რომელსაც აქვს სათანადო ცოდნა და გამოცდილება, მიაღწია 21 წლის ასაკს და ფლობს სახელმწიფო ენას, შრომითი ხელშეკრულების საფუძველზე შეუძლია დაინიშნოს სახელმწიფო მოხელედ, გარდა, პოლიტიკური თანამდებობისა.
შესაბამისი ცვლილებები უნდა შევიდეს „საჯარო სამსახურის შესახებ“ და „უცხოეთში მცხოვრები თანამემამულეებისა და დიასპორული ორგანიზაციების შესახებ“ კანონებში.
ამასთან, თანამემამულის სტატუსი შეიძლება მიიღოს პირმა, რომლის მიმართ, შესაბამისი პროცედურების გავლის შემდეგ, დადასტურდება მისი საქართველოდან წარმომავლობა ან/და მისი მშობლიური ენის ქართველურ-კავკასიური ენებისადმი კუთვნილება.