"დემოკრატიული მოძრაობა" ვალერი გელბახიანს პრეზიდენტ სააკაშვილის პოლიტპატიმრად მიიჩნევს.
როგორც პარტიის მიერ დღეს გავრცელებულ საგანგებო განცხადებაშია აღნიშნული, ვალერი გელბახიანის დაპატიმრება კიდევ ერთი მაგალითია იმისა, თუ რამდენად არ აინტერესებს დღევანდელ ხელისუფლებას საზოგადოების აზრი და მისთვის სასურველი შემთხვევების გარდა, როგორ არაფრად აგდებს თავდებობის ინსტიტუტს.
"მიუხედავად იმისა, რომ პოლიტიკური პარტიების ლიდერები, საზოგადოებისათვის ცნობილი ადამიანები მყისიერად გამოეხმაურნენ ვალერი გელბახიანის თხოვნას, მისთვის თავდებობის გაწევასთან დაკავშირებით, საქართველოს ხელისუფლებამ ბატონი ვალერი გელბახიანი თბილისის აეროპორტში ჩამოსვლისთანავე დააპატიმრა.
"დემოკრატიული მოძრაობა" კიდევ ერთხელ აცხადებს, რომ ვალერი გელბახიანი არ წარმოადგენს საზოგადოებისათვის არანაირ საშიშროებას, ის, ისევე, როგორც არაერთი ჩვენი თანამემამულე, გახლდათ სააკაშვილის ხელისუფლების პოლიტიკური დევნილი. ახლა უკვე მისი პოლიტპატიმარია.
ვალერი გელბახიანის დაპატიმრება კიდევ ერთი მაგალითია იმისა, თუ რამდენად არ აინტერესებს დღევანდელ ხელისუფლებას საზოგადოების აზრი და მისთვის სასურველი შემთხვევების გარდა, როგორ არაფრად აგდებს თავდებობის ინსტიტუტს. მაშინ, როდესაც ის ვადაზე ადრე ათავისუფლებს სანდრო გირგვლიანის მკვლელებს, აპატიმრებს მომაკვდავი დედის სანახავად ჩამოსულ ადამიანს, მხოლოდ იმის გამო, რომ მას განსხვავებული პოლიტიკური შეხედულებები აქვს", - ნათქვამია განცხადებაში.
"დემოკრატიული მოძრაობა" კატეგორიულად მოითხოვს ხელისუფლებისგან, მისცეს ვალერი გელბახიანს ავადმყოფი დედის ნახვის შესაძლებლობა და მის მიმართ ყველა საგამოძიებო მოქმედება კანონის სრული დაცვით ჩატარდეს.
ვალერი გელბახიანი ქართველმა სამართალდამცველებმა საქართველო-სომხეთის საზღვარზე გუშინ დააკავეს.