ნატო-ს წევრი ქვეყნების ლიდერებმა ჩიკაგოში სამიტის დეკლარაცია მიიღეს, რომელშიც საქართველოს სამი პუნქტი შეეხება.
საქართველოს პრეზიდენტის ადმინისტრაციის ცნობით, დამატებით ორი პუნქტი მთლიანად რეგიონს ეთმობა, რომელშიც თავისთავად საქართველოც მოხსენიებულია.
დეკლარაციაში პირველად ჩაიწერა იმის შესახებ, რომ საქართველო ნატო-ს ასპირანტი ქვეყანაა. ნთქვამია, რომ ალიანსი რჩება ბუქარესტის სამიტის გადაწყვეტილების ერთგული და საქართველო აუცილებლად გახდება ნატო-ს წევრი.
„ბუქარესტის სამიტზე შევთანხმდით, რომ საქართველო გახდება ნატო-ს წევრი და კიდევ ერთხელ ვადასტურებთ ამ გადაწყვეტილებისა და შემდგომში მიღებული გადაწყვეტილებების ყველა ელემენტს. მივესალმებით საქართველოს პროგრესს, რომელსაც მან ბუქარესტის სამიტის შემდგომ პერიოდში მიაღწია, რათა რეფორმების წლიური ეროვნული პროგრამის განხორციელებისა და ნატო-საქართველოს კომისიის ფარგლებში, ალიანსთან აქტიური პოლიტიკური ჩართულობის გზით, სისრულეში მოიყვანოს ევროატლანტიკური მისწრაფებები“ - აღნიშნულია დეკლარაციაში.
ნატო-ს წევრი ქვეყნები პოლიტიკური დიალოგის გაძლიერებით და პრაქტიკული თანამშრომლობით საქართველოსთან კავშირის გაფართოებაზე შეთანხმდნენ.
დოკუმენტის თანახმად, ალიანსი კიდევ ერთხელ უცხადებს მხარდაჭერას საქართველოს ტერიტორიულ მთლიანობას და 2009-2010 წლების სამიტების ორი დეკლარაციის მსგავსად, კიდევ ერთხელ მოუწოდებს რუსეთს „გააუქმოს საქართველოს სამხრეთ ოსეთის და აფხაზეთის რეგიონების აღიარება“.
ნატო ასევე, მოუწოდებს ჟენევის მოლაპარაკებაში მონაწილე მხარეებს, შეასრულონ კონსტრუქციული როლი და ეუთო-სთან, გაერო-სა და ევროკავშირთან მჭიდრო თანამშრომლობით, ხელი შეუწყონ საქართველოს საერთაშორისოდ აღიარებულ საზღვრებში კონფლიქტის მშვიდობიანი გზით მოგვარებას.
დეკლარაციაში გამოხატულია ნატო-ს ოფიციალური პოზიცია - ალიანსი „შეშფოთებულია საქართველოს ტერიტორიაზე რუსეთის სამხედრო ძალების ზრდით“ და ისევ მოუწოდებს რუსეთს უზრუნველყოს კონფლიქტის ზონებში ჰუმანიტარული დახმარებისა და საერთაშორისო დამკვირვებლების თავისუფალი შესვლა.
დეკლარაციაში ნატო-ს წევრი ქვეყნების ევროატლანტიკურ უსაფრთხოებაში საქართველოს, როგორც ISAF-ის სამხედრო ძალების მეორე მსხვილი ნატო-ს არაწევრი კონტრიბუტორის, მნიშვნელოვანი წვლილის გამო მადლიერება გამოხატული.
საქართველოს პრეზიდენტმა მიხეილ სააკაშვილმა ნატო-ს სამიტის ფარგლებში დაგეგმილ ღონისძიებებში მონაწილეობა მიიღო.