რუსეთთან ურთიერთობების საკითხებში პრემიერ-მინისტრის სპეციალური წარმომადგენლი ზურაბ აბაშიძე ოპონენტებს მესამე კლასის გეოგრაფიის სახელმძღვანელოს ყიდვას ურჩევს.

აღნიშნულით აბაშიძე ევრაზიულ კონტინენტთან დაკავშირებით საგარეო საქმეთა ახალი მინისტრის გიორგი კვირიკაშვილის გუშინდელ განცხადებას გამოეხმაურა.

კითხვაზე, თუ რა კონტექსტში ახსენა გიორგი კვირიკაშვილმა ევრაზიული კონტინენტი და ხომ არ იყო საუბარი ევრაზიულ კავშირზეც, ზურაბ აბაშიძემ განაცხადა, რომ ეს სულ სხვადასხვა რაღაც არის.

„ევრაზიულ კონტინენტს რაც შეეხება, თუ ჩვენმა რომელმა ოპონენტმა ვერ გაიგო რას გულისხმობდა გიორგი კვირიკაშვილი, აუცილებლად უნდა იყიდოს მესამე კლასის გეოგრაფიის სახელმძღვანელო. იქ ძალიან კარგად არის დახატული რას წარმოადგენს ევრაზიული კონტინენტი. ისე, წინდაწინ გავამხელ საიდუმლოს, ევრაზიული კონტინენტი შედგება ევროპისგან და აზიისგან“, - განაცხადა აბაშიძემ.

გუშინ გიორგი კვირიკაშვილმა საგარეო საქმეთა მინისტრის პოსტზე წარდგენისას ქვეყნის პრიორიტეტებზე გაამახვილა ყურადღება, მათ შორის, ახსენა აღმოსავლეთთან ურთიერთობები და ახალი მოვლენები ევრაზიის კონტინენტზე.

„ძალიან ბევრი საინტერესო რამ ხდება მსოფლიოში, პროდასავლური მიმართულებისა გარდა. ეს არის აღმოსავლეთთან ურთიერთობები, ეს არის ახალი მოვლენები ევრაზიის კონტინენტზე. ჩვენ მაქსიმალურად შევეცდებით, ყველა ამ საინტერესო მოვლენის მაქსიმალური ტრანსფორმაცია მოხდეს საქართველოსთვის, როგორც პოლიტიკური, ასევე ეკონომიკური კუთხით“, - განაცხადა გიორგი კვირიკაშვილმა.