ტელეკომპანია „პირველი სტერეოს“ და სამაუწყებლო კომპანია „სტერეო პლუსის“ დამფუძნებელი დავით ზილფიმიანი საპარლამენტო  უმრავლესობის წევრს დავით ბეჟუაშვილს მისი ქონების მითვისებაში ადანაშაულებს.
როგორც ვილფიმიანმა დღეს გამართულ პრესკონფერენციაზე აღნიშნა, მან იტალიაში გამგზავრების წინ, 11 მაისს შვილს „სტერეო პლუსის“ წილი გადაუფორმა, 12 მაისს კი, ბეჟუაშვილმა, რომელიც „პირველ სტერეოში“ მისი პარტნიორია, სასამართლოში განცხადება შეიტანა, თითქოს, მათ დავით ზილფიმიანი აზარალებდა.
ბიზნესმენის განმარტებით, ეს განცხადება მხოლოდ ვარაუდს ეფუძნება.
„მოსამართლე ზაზა მარტიაშვილმა, ჩემი ქონების დაყადაღების გადაწყვეტილება მიიღო. დოკუმენტი საჯარო რეესტრში მიიტანეს და სასამართლოს განჩინებით, ჩემი ქონების დაყადაღება მოითხოვეს. რეესტრს 5 დღიანი ვადა არ გამოუყენებია და იმავე დღეს „პირველი სტერეო“ და „სტერეო პლუსი“ დამიყადაღეს“ - განაცხადა ზილფიმიანმა.
„ყადაღას 4 დღეში გასდის ვადა. ისინი შემდეგი პროცესისთვის ემზადებიან, რომ ყადაღის ვადა, რაც შეიძლება დიდხანს გაიწელოს და ბიზნესის თავისუფლად წარმოების საშუალება არ მქონდეს“-აღნიშნა მან.
ზილფიმიანი ქონების დაყადაღების 2 მიზეზს ვარაუდობს.
„აქ მხოლოდ 2 მიზეზს ვხედავ. ერთია - „მეცხრე არხთან“ ტექნიკურ მოსახურებაზე გაფორმებული კონტრაქტი, მეორე - ჩემი შვილისთვის კომპანიის გადაფორმება. სხვა ცვლილება არ მომხდარა“ - განაცხადა ზილფიმიანმა და აღნიშნა, რომ მომავალ კვირაში, ელიტური კორუფციის გამოსავლენად კონკრეტულ სახელებსა და გვარებს დაასახელებს და იმ შემთხვევაში თუ ამის შემდეგ, შესაბამისი უწყებები რეაგირებას არ მოახდენენ, ის სასამართლოს თავად მიმართავს.
ბიზნესმენის განცხადებით, ის თავისი ქონების დათმობას არ აპირებს.