ოპოზიციონერი დეპუტატი ჯონდი ბაღათურია პრეზიდენტ მიხეილ სააკაშვილის იმპიჩმენტთან დაკავშირებით პარლამენტში  კონსულტაციების დაწყებას გეგმავს.
როგორც ბაღათურიამ დღეს პარლამენტში, დავით გარეჯის სამონასტრო კომპლექსის პრობლემასთან დაკავშირებით არასამთავრობო ორგანიზაციებთან შეხვედრისას განაცხადა, პრეზიდენტმა ქვეყნის ტერიტორია დატოვა მაშინ, როდესაც აზერბაიჯანელმა მესაზღვარეებმა საქართველოს ტერიტორია გადმოკვეთეს.
„ვერ გეტყვით, ამ შემადგენლობის პარლამენტში რა პერსექტივა აქვს პრეზიდენტის იმპიჩმენტს, თუმცა, იმპიჩმენტის სამართლებრივი საფუძველი სახეზეა - პრეზიდნეტი გაიქცა სახელმწიფოდან, მაშინ როდესაც ქვეყნის წინააღმდეგ განხორციელდა აგრესია, საზღვარი გადმოლახეს მეზობელი სახელმწიფოს შეიარაღებულმა სასაზღვრო ძალებმა და დაიკავეს მნიშვენლოვანი ტერიტორია, სადაც საქართველოს ეროვნული სიწმინდეა განთავსებული“ – განაცხადა ბაღათურიამ.
მისივე თქმით, პრეზიდენტმა ამ ფაქტზე არანაირი რეაგირება არ მოახდინა და „მილანში საათების ყიდვით ერთობოდა“.
„ეს არის მორალურად სამარცხვინო საქციელი, ხოლო სამართლებრივად პასუხისგებაში მისაცემი და პრეზიდენტი თანამდებობიდან უნდა იყოს დათხოვნილი“ – აღნიშნა დეპუტატმა.
ამასთანავე, ბაღათურია მიიჩნევს, რომ საქართველოს შსს–ს სასაზღვრო პოლიციამ უნდა განმარტოს, თუ რა პირობებში დატოვეს ქართველმა მესაზღვრეებმა ტერიტორია.
„ჩვენ არ უნდა დავუშვათ პროვოკაცია, თუმცა, ყველამ კარგად უნდა იცოდეს, რომ ჩვენი ტერიტორიების შესანარჩუნებლად ვიბრძოლებთ“ – განაცხადა ბაღათურიამ და დასძინა, რომ აზერბაიჯანელმა მესაზღვრეებმა დაუყოვნებლივ უნდა დატოვონ გარეჯის უდაბნოს ტერიტორია.
ქართველი ბერების ინფორმაციით, აზერბაიჯანელი მესაზღვრეები დავით გარეჯის სამონასტრო კომპლექსის ტერიტორიაზე 6 მაისის შემდეგ გამოჩნდნენ და ქართველ მომლოცველებს იქ გადაადგილების საშუალებას არ აძლევენ.