კამპანია ,,ეს შენ გეხებას“ წევრი მედიისა და არასამთავრობო ორგანიზაციების წარმომადგენლები საარჩევნო კანონმდებლობაში შესატან ცვლილებათა   პაკეტს საერთაშორისო ორგანიაზიებსა და პოლიტიკურ პარტიებს აცნობენ.
შეხვედრას მრგვალი მაგიდის ფორმატი აქვს და სასტუმრო ,,ქორთიარდ მარიოტში“ მიმდინარეობს.
,,ეს შენ გეხება“ მონაწილეებს იმ საკანონმდებლო წინადადებათა პაკეტს წარუდგენს, რომელიც მათ 7 მაისს, პარლამენტში შეიტანეს.
საკონმდებლო წინადადებების პაკეტი ითვალისწინებს - 1. არჩევნების დღეს ხმის დათვლის პროცედურების დახვეწას. ამ პუნქტის თანახმად, საუბნო საარჩევნო კომისიებში საარჩევნო ყუთების გახსნამდე უნდა მოხდეს შემაჯამებელ ოქმში კენჭისყრაში მონაწილე ამომრჩეველთა რიცხვის დოკუმენტურად დაფიქსირება. კამპანიის წევრთა თქმით, ეს საუბნო საარჩევნო კომისიებს საშუალებას აღარ მისცემს უბანზე მოსული ამომრჩეველთა რაოდენობა არჩევნების შედეგების გარკვევის შემდეგ შეცვალონ. კერძოდ, საარჩევნო ადმინისტრაციისთვის არასასურველი შედეგების დაფიქსირების შემთხვევაში, ამ ცვლილებით ოქმების გადაკეთების შესაძლებლობა გართულდება.
2. საარჩევნო ადმინსიტრაციის საქმიანობის გამჭვირვალობის უზრუნველყოფა - ეს გულისხმობს წინასაარჩევნო პერიოდში ცესკო-სა და საარჩევნო კომისიების სხდომების პირდაპირი ე.წ ,,ლაივსტრიმით“ ინტერნეტ ტრანსლირებას.
3. ადმინისტრაციული რესურსების გამოყენების რეგულირება - ამ ცვლილების თანახმად, ადმინისტრაციული რესურსების გამოყენებაზე პირველი ივნისიდან შეზღუდვები უნდა დაწესდეს. ასევე, ყალიბდება ბიუჯეტის ხარჯვის უფრო ზუსტი რეგულაციები და საბიუჯეტო რესურსების გამოყენებაზე მკაფიო შეზღუდვები.
4. საარჩევნო პერიოდში პოლიტკური პარტიებისთვის მედიათანაბრობის უზრუნველყოფა - აღნიშნული პუნქტის თანახმად, ფარული რეკლამის განსაზღვრება შეიქმნა. ასევე, კომუნიკაციების მარეგულირებელი კომისიისთვის ქართული და საერთაშორისო ორგანიზაციების მიერ განხორციელებული მედიამონიტორინგის შედეგების განხილვა სავალდებულო უნდა გახდეს და მათზე რეაგირება მოხდეს.
5. საარჩევნო სუბიექტებისთვის გარე რეკლამის თანაბარი ხელმისაწვდომობა - წინასაარჩევნო პერიოდში გარე რეკლამის გამოყენების წესი და მექანიზმი გაიწერა. ამ ცვლილებით, ერთი სუბიექტის მიერ წინასაარჩევნო პერიოდში გარე რეკლამის მონოპოლიზება გამოირიცხება.
6. ადმინსიტრაციული და სახელმწიფო ორგანოების სარეკლამო ხარჯების საჯაროობა - ამ პუნქტში, სარეკლამო ხარჯების ცნება განიმარტა.
7. მაუწყებლობის ტრანზიტის საავტორო და მომიჯნავე უფლებების სფეროში საქართველოს კომუნიკაციების ეროვნული კომისიის უფლებამოსილებების განსაზღვრა - პროექტით საკაბელო ქსელების ოპერატორებს საზოგადოებრივი, სათემო და თანამგზავრული მაუწყებლობების სატელევიზო სიგნალების სავალდებული წესით რეტრანსლაციის ვალდებულება ეკისრებათ. ამასთან, მაუწყებელი საკაბელო ქსელების ოპერატორებისთვის თავისი სიგნალის რეტრანსლაციის უფლების მიყიდვაზე ვალდებულება ეკისრება.