აშშ-ში ვიზიტით მყოფი საქართველოს პრეზიდენტი მიხეილ სააკაშვილი, ამერიკაში სამუშაოდ მყოფ ქართველ ექიმებს შეხვდა და მათ ჯანდაცვის სფეროში განხორციელებული რეფორმები გააცნო.
როგორც შეხვედრაზე პრეზიდენტმა აღნიშნა, მედიცინის თვალსაზრისით, საქართველო მალე აღმოსავლეთ ევროპის ცენტრი გახდება. მიხეილ სააკაშვილი მედიკოსებს ქვეყნის საკურორტო ზონების განვითარების საკითხსაც შეეხო და განაცხადა, რომ ამ მხრივ, სამედიცინო ტურიზმს დიდი პოტენციალი აქვს.
„საქართველოში სამედიცინო სექტორი საგრძნობლად ვითარდება. ქვეყნის მასშტაბით 150 პატარა და დიდი კლინიკა იხსნება. მაქვს პრეტენზია, რომ აღმოსავლეთ ევროპასა და პოსტსაბჭოთა სივრცეზე ყველაზე თანამედროვე სამედიცინო სისტემას ვქმნით“ - განაცხადა სააკაშვილმა.
სახელმწიფოს მეთაურის თქმით, საქართველოში იწყება აღმოსავლეთ ევროპასა და პოსტსაბჭოთა სივრცეში ყველაზე დიდი სამედიცინო ცენტრის მშენებლობა. პროექტის ბიუჯეტი 250–300 მლნ აშშ დოლარია და მას კორეელები ახორციელებენ.
მან სარეაბილიტაციო კურორტების განვითარების აუცილებლობაზეც გაამახვილა ყურადღება და აღნიშნა, რომ ამ მხრივ ქვეყანას დიდი რესურსი აქვს. მისი თქმით, მნიშვნელოვანია ბევრი პროფესიონალი და კვალიფიციური კადრი მუშაობდეს, პრეზიდენტმა ამერიკაში მოღვაწე წარმატებულ ექიმებს ამ პროცესში აქტიური ჩართვა სთხოვა და მათ დაგროვილი ცოდნისა და გამოცდილების ქართველი კოლეგებისთვის გაზიარება შესთავაზა.
მიხეილ სააკაშვილი აშშ-ში სამუშაო ვიზიტით გუშინ გაემგზავრა. პრეზიდენტის პრესსპიკერის თქმით, ვიზიტის ფარგლებში, იგი ნიუ-იორკს, ლოს ანჯელესს და ჩიკაგოს ეწვევა.
20-21 მაისს პრეზიდენტი ჩიკაგოში ნატო-ს სამიტის მუშაობაში მიიღებს მონაწილეობას.