პარტია „სალომე ზურაბიშვილი-საქართველოს გზის“ ერთ-ერთი ლიდერი მამუკა ბალიაშვილი თბილისის საკრებულოს დღევანდელ საგანგებო სხდომას გამოეხმაურა, რომელზეც სტიქიის მიერ დედაქალაქისთვის მიყენებულ ზარალსა და მის სალიკვიდაციოდ ბიუჯეტიდან თანხების გამოყოფაზე იმსჯელეს.
ბალიაშვილი ზარალზე საუბარს მისი გამომწვევი მიზეზების განხილვის გარეშე, გაუმართლებელს უწოდებს.
„გუშინ თინა ხიდაშელი კოლეგებისგან იმ მასალების გასაჯაროებას ითხოვდა, რომელიც სანიაღვრეების მოწესრიგებაზე ჩატარებულ ტენდერს ეხება. მსგავსი დოკუმენტი, როგორც წესი, საჯაროა, თუმცა, გაუგებარია მერია რატომ მალავს. ჩვენ შევძელით მისი მოპოვება, რომლის თანახმად, სანიაღვრეების ექსპლუატაციაზე 2 მილიონიანი ტენდერი ჩატარდა, მერიამ აღნიშნული მომსახურება შპს „თბილსერვის ჯგუფს“ დაუკვეთა, რომლის 100%-იანი წილის მფლობელი თბილისის მერიაა“-განაცხადა ბალიაშვილმა.
მისი განმარტებით, დოკუმენტიდან ირკვევა, რომ სანიაღვრეებთან დაკავშირებით პრობლემებია, მერია კი, პრობლემების ნაწილობრივ მოგვარებას 2012 წლის ბოლომდე აპირებს.
ბალიაშვილი დარწმუნებულია, რომ ხელისუფლება მოსალოდნელი საფრთხის შესახებ საქმის კურსში იყო, მაგრამ მის თავიდან ასაცილებლად არაფერი გააკეთა და პრობლემის მოგვარება წლის ბოლომდე გადადო.
„სალომე ზურაბიშვილი-საქართველოს გზა“ თბილისში მომხდარ ტრაგედიაში მერიას ადანაშაულებს და გიგი უგულავას პასუხისმგებლობის საკითხს სვამს, ასევე, სატენდერო დოკუმენტაციის საფუძველზე, მოკვლევას ითხოვს.